Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van die ander rebellicheit der Lukeneren ende hoe die stede van Dynandt ghewonnen wert ende ghedestrueert.
Dat XLIX capitel.

In ditselve jaer van LXVI was dye grave van Charloys getogen int lant van Artoys, om sonderlinge saken te expedieren, daer hij lange tijt bleef leggen. Ende als hertoge Philips, sijn vader, alle dage crancker worde, so bestonden die Lukeners weder te rebelleren, doende grote scade in den landen van Brabant ende Limburch. Bisonder waren die van Dynant seer wel gemoet, om alle quaet ende scade te doen, gemerct dat si groten hulp, bystant ende assistency hadden van die stat van Ludic, hebbende veel volcs binnen uut andere steden, ende dattet een uutermaten vaste ende starcke stede was, daer si hem seer in verlieten ende te stouter waren, doende vele scaden van roven ende branden in den landen van Brabant, Henegouwen ende Namen. Bisonder molesteerden ende deden si veel schaden die stede van Bouvijn, die neffens der Masen over lach, ghelegen int graefscap van Namen, toebehorende den hertoge van Bourgongen. Hierenboven dichten, spraken ende songhen si vele lijdekens die scandeliken ende scoffierliken luden opten hertoge van Bourgondyen ende sinen sone, als dat hi so koen niet en ware te comen int lant van Ludic om te striden. Ende als sijn sone, die grave van Charloys, in dye maent van julio weder uut Artoys tot Brusel gecomen was, bereide hem die hertoge te beleggen die van Dynant. Dye van Dynant dit horende, bespotten ende verachten den hertoghe ende sinen sone, segghende: 'Hi sal ons bestormen ende bevechten gelijken hi dede die van Amersfoert ende van Chalys.' Ende tot een teyken van vermetelheyt ende tot meerre bespottinghe setten si een metalen wijf op die mueren van der stede, hebbende een spinrocken in dye handt, daer voer ghescreven stont aldus: 'Als dit wijfs vingheren sijn doerghesponnen, dan soe sal Dynandt ghewonnen worden.' Want die stede was sere vast ende starck, ende oeck lang ende uutermaten rijck ende machtich van volcke. Ende was oeck hoech van mueren ende toernen,

[p. 311r]

mit diepe graften ombegraven, wel versien, bescermt van allen anstoet, mit allerley instrumenten van aertelrye, bebolwerct mit starcke fortressen ende borstweren voer de poorten. In dese stede waren VII parochykercken, mit ene sonderlinge scone ende costelike kercke ende canosie van waerlike canonicken, vele costlike scone cloesteren, bysonder¹⁰⁴ een scone abdye, van denwelken sommige binnen die stede, ende enige buten stonden. Op die ene side van der stede lach enen groten hogen stenen berge, dair een starck casteel opgetimmert stont, die deen side van der stede bescermde, ende an dander side stonden hoge mueren ende toornen, daer dye Maze langes vloyde; waerom dat si den hertoge te min ontsagen, ende te stouter waren. Om deser voorseyder ponten willen ontseyde die hertoge die stede van Dynant, doende gemeen heervaert bieden over alle sinen landen, vergarende vele edele heren, baroenen, ridderen, sciltknechten, sijnre vasallen ende leenmannen, een uutermaten ende ontelliken groten volc van wapenen, doende bovendyen uut allen landen bi hem vele cloeke ende vrome zoudenyers ende knechten comen. Dit vernemende die van Dynant, vastichden hoer stede, besettende die muren ende poorten mit cloeke ende starcke mannen, doende binnen haer stede comen vele koerns, vitaelge ende alle wes si behoeven mochten. Daerenboven vele cloeke zoudenyers ende knechten. So is dan die hertoge, hoewel hi een out, cranc man was, gecomen op Sinte Laurens dach, met sinen sone, den grave van Charloys, mit uutermaten vele wagens, paerden, archyers ende¹⁰⁵ veel instrumenten van orlogen ende artelrye, om te bestormen die stede van Dynant mit al hoer macht in dye stede van Namen. Here Kaerle, grave van Charloys, in die stede van sijn vader, den hertoge van Bourgondien, als overste cappetein ende hooftman van alle desen volke, is mit dit grote heer gecomen voer Dynant, ordinerende sijn volc om die stede mit goeder voersichtiger deliberacie. Alle ding wel bereyt ende geordineert wesende, begonnen die stede te bescyeten, doende dair menich vroem assault ende scermutsingen voren, dach ende nacht bestormende ende bescietende, sonder ophouden. Die van binnen stelden hem vromelic ter weer op die muren, poorten ende toernen, ende keerden dye vianden cloekelic van der stede. Dit en mocht hem niet veel baten, want si so vreseliken scoten ende worpen mit grooten steenbussen op dat casteel van der stede, dat si dat int einde wonnen ende machtich worden. In den here waren vele piccaerden; dese bestonden te graven onder daerde henen, om also in der stat comen. Bovendien scoten si vervaerliken ende gryselicken, dat men bi wilen die stede van tstof ende roeck niet sien en mochte. Die archyers scoten oec so veel viers in der stede, dat men nyet en wiste die hele lucht stont an brande. Daer worde also veel volcs binnen ende voor dye stede dootgescoten, dat mer geen ghetal of en weet. Ende ten lesten heeft die grave van Charloys so stadeliken ende crachteliken op die stede gescoten ende gestormt, dat hi se mit vechtender ende geweldiger hant gewonnen ende becrachticht heeft, des dages na Sinte Bertelmeeus dach. Int incomen van der stede worden vele ende tmeeste deel van den poorteren ende zoudenyers dootgeslagen ende vele van den rijcxsten gevangen genomen, ende mit allen veel in der Masen verdroncken. Daerna dede hi alle¹⁰⁶ die muren, poorten ende toernen van der stat tot in den gront ofbreken, nederwerpen ende ter aerden toe slechten, dat den enen steen en bleef nyet opten anderen leggen. Doe dede hi die stat tot allen steden an brande steken, kercken ende cloesteren ende alle datter in was, mit alle die daer ingevlucht ende gevloden waren verbranden. Die stede wert also gedestrueert, vernyelt, verwoest ende allen menschen onwoenber gemaect. Want dye mueren der husen ende kercken van den brande ter neder vielen, ende daer en bleef niet staen.

104 bysouder AB.

105 eude AB.

106 alle alle AB.