Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die Ghelressen quamen ende branden die stede van Yselstein.
Dat XLVIII capitel.

Int jaer M CCCC LXVI, als here Adolf van Ghelre sinen vader omtrent een jaer lang gevangen hadde gehouden, wert hi sere twistende tegen sinen oem, hertoge Jan van Cleve, van sijns moeders wegen, ende tegen here Willem van Egmont, sinen oem van sijns vaders wegen, doende confisceren ende toeslaen tot sijnre tafelen alle des heren van Egmonts sijns oems goeden, leggende in den lande van Ghelre. Daerenboven woude hi weder hebben met fortsen alle die goeden de hertoge Aernt, sijn vader, verset hadde, als die stede van Wachtendonck, tlant van der Diffelen ende Rijcswalt. Daerenboven allegeerde hi noch dat sijn vader die hertoge niet al betaelt en was van alsulcke huwelicxe voerwaerden als hem mitter hertoechinne, vrouwe Katrine, sinen wive, geloeft waren; ende woude dit altesamen weder hebben. Hertoge Jan van Cleve, anmerckende die groetmoedicheit heren Adolfs van Ghelre, heeft hem verbonden ende aliancye gemaect mitten here Willem van Egmont ende Yselstein, joncheer Gherrit van Culenburch, ende mit den here van Buchoven¹⁰² tegen den voirseiden here Adolf van Gelre, ende hebben hem doen ontseggen, menende hem te dwingen dat hi sinen vader uuter vangenissen ontslaen soude, doende malcanderen grote scade mit roven, branden, pilgeren ende vangen, verwoestende die landen mit allen seer. Joncheer Vrederic van Egmont, op dese tijt grave van

102 Bnchoven AB.

[p. 310v]

Bueren, also voren geseit is, gevangen wesende mit hertoge Aernt van Ghelre, ontquam mit groter cloecheden, stellende hem mit sinen vader, broeders ende ander heren vromelic ter weer tegen here Adolf van Gelre, horen neve, waerom here Adolf gesonnen heeft here Otte van Vueren mit veel ghewapents volcs in der graeflicheit van Hollandt, om te verbarnen ende te destrueren die stede van Yselstein, dwelc si gedaen hebben, pilgerende ende berovende die stede van al dat si mit hem nemen mochten. Als dese Ghelresse wederom keerden na den lande van Ghelre, so quamen van dyen omtrent XLV in die stede van Gorichom, menende daer gesalveert ende vry te wesen. Ende also die stede den grave van Charloys toebehorende is, worden si allegader gevangen¹⁰³ genomen; ende luttel tijts hier na sijnder XIX uut die vangenisse gebroken, ende liepen totten Minrebroederen in die kercke. Ende die ander bleven in dat Heilige Geesthuys, hopende daer vry te wesen; denwelcken nochtans die stedehouder mit gewelt van den gewyden plaetsen genomen heeft, ende voerde se in Den Hage, om daer ter justicie te setten. Vele vrouwen sijn gecomen uuten landen van Ghelre die haer mans, haer kinderen ende haer broeders daer gevangen lagen, biddende ende belovende mit screyenden ogen grote sommen van penningen om hoer verlossinge, want daer vele edele ende rijcke mannen mede waren; ende bysonder van Nimmagen. Uuten welken die Raet van Hollant tot ghenade ende bermherticheyt beroert worden, ende hilden se noch een tijt lanc gevangen. Mer hertoge Phillips verhorende van hore quade feiten, als dat si tlant van Hollant gescent ende bescadicht hadden buten enigen oerlogen ende sonder ontseggen, gaf een sentency dat men se allegader onthoefden soude als moerdenaers ende straetscenders, op raden setten. Van desen worter XX gerecht des dages na Sint Jans dach voer die Latijnse poert, ende des donredages na Pijnxster die ander XXV, ende worden alle op raden geset, uutgeseyt IIII, die om grote penningen gecoft worden ende opten kerchove begraven worden.

103 genangen AB.