Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat den pays tusschen den hertoge van Bourgongen ende den Lukeners ghemaect wert, bi toedoen here Kaerle, grave van Charloys, des hertogen soen.
Dat XLVII capitel.

Hierna is mit groter triumphen ende victorien uut Vrancrijc ghecomen here Kaerle,

[p. 310r]

grave van Charloys, mit alle sijn heer ende volc van wapen, ende sant terstont sinen bastert broeder, here Anthonis mit een deel gewapende int graefscap van Namen, want die Lukeners daer dagelicx grote scade van roven ende branden in deden, ende besette die frontieren ende palen van den landen also, dat si voert meer so groten scade niet en deden. Ende die grave voechde hem mitten anderen heren ende princen mit al dat volc van wapenen, om te beleggen die stat van Ludic. Die van Ludic dit siende, quamen terstont uuter stat, mit een groot swaer volc van wapenen, ende ordineerden hem in goeder battaelgen ende ordinancien, om tegen den grave te striden; ende stonden op een groot plein velt, mit ontwonden bannieren, verwachtende den grave mitten sinen. Ende siet, die grave ordineerde mede sijn battaelgen ende dede den Lukeners al omme besetten, opdat si hem nyet ontvlyen en souden, als die strijt begonnen ware. Ende als si aldus rontomme wel beset ende besloten waren, dat si nergens henen mochten, dede hi sinen bannyer ontwinden ende die trompetten ende trommelen slaen, ende bereyden hem vromelic tegen den Lukeners an te gaen. Als die Lukeners dat sagen, hilden raet ende senden enige uut totten grave, begerende hem op te geven in sinen handen; ende dat hij se nemen woude in genaden, si wouden doen al dat hem beliefde tot seggen ende discrecie van den edelen, ende wouden gaerne beteringen doen van den scaden, die doer hemluden gedaen waren. Dit horende die grave, sant terstont an alle sine cappeteinen die omtrent den Lukeners al omme beseten ende geordineert waren, dat si den Lukeners niet bevechten en souden, want si hem in der genaden des graven van Charloys gegeven hadden. Ende daer wert enen pays ende vrede gemaect tusscen den biscop Lodewijc van Ludic ende hen, ende tusschen den Lukeners, welken pays si swoeren te onderhouden, ende daer worden sekere brieven¹⁰¹ of gemaect ende besegelt in deser manieren: Als dat si na desen dach horen biscop souden obedieren ende tegen hem niet weder rebellen noch opstaen. Ende dat si souden terstont opsenden te Romen om te impetreren ende te verwerven van den paeus absolucie van den banne ende interdicte daer si dus lange in gestaen hadden. Ende geven tot emende ende voer den scade die si hertoge Phillips ende sinen sone den grave van Charloys gedaen hadden, binnen den tijt van IIII jaren VI C M Rijnsche Gulden. Des so souden die hertoge ende die grave sijn sone bliven ende wesen des Stichts van Ludics voecht ende momber. Ende dit aldus getracteert ende concludeert wesende, als voorscreven is, reisde die graef sonder enige meer scade te doen tot sinen vader, den hertoge, tot Brusel; ende die Lukenaers togen weder mit groter bliscapen in hoer stat. Dit geschiede int beghinsel des maents januarij int jaer ons Heren M CCCC LXVI.

101 brienen AB.