Hoe dat die gravinne van Charloys oflivich worde.
Dat XLV capitel.
Binnen desen tiden dat dese dingen ende oerlogen in Vrancrijc getracteert ende gehandelt worden, so en hadde die graefinne van Charloys in langen tiden geen tidinge noch boetscappe van horen man, grave Kaerle van Charloys vernomen noch gehat, daer si sere in tonvreden was, verduchtende oft hi in Vrancrijc geslagen ware; waerom si op die tijt tot Gorichom wesende van rouwen te bedde viel, ende wert bevangen mit eenre groter siecten. Daer worden ontboden uut vele plecken experte ende doersochte meesters om haer te cureren ende te helpen, mer si en mochten niet. Doen wert haer geraden te trecken te Ghent tot horen lieven enigen dochter, om haer recreacie ende solacie daermede te hebben; ende comende tot Antwerpen wert si so mitter siecten bevaen, dat si haer liet brengen in Sinte Michiels cloester, ende daer ontfinc si mit groter berouwen hore sonden die Sacramenten der Heiliger Kercken ende sceyde van deser wereltGa naar voetnoot87 op Sinte Cosmas ende Damiaens avont int jaer M CCCC LXV, ende wert in derselver abdien begraven, rustende onder enen costeliken tombe. Si was een devote ende heilighe vrouwe, doende vele aelmissen; si plach dicwils mit een dienstjoncfrou te gaen totter armer luden huse, ende gaf hem milde aelmissen. Aldus wert si gecompareert ghelijc te wesen den heiliger vrouwen Elizabeth.
Auteursrechtelijk beschermd