Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dit oerloge tusscen den coninc ende den grave gesoent wert.
Dat XLIIII capitel.

Desen strijt gesciet wesende, quamen op Sinte Marien Magdalenen avont bi den grave van Charloys, tot Estampus leggende, die hertoge van Berry, des conincs broeder, die hertoge van Bourbon, dye hertoge van Calabren, die grave van Dunoys mit meer andere machtige princen, baroenen ende heren, mit een scoen gheselscap van archyers ende vrome wapentuers, ende deden den grave grote eer ende reverencie, hem sere beclagende, dat hi dus onrechteliken van den coninc bevochten was, ende dat si dair niet mede geweest en hadden. Ende bleven daer tot opten lesten dach van julio, dat den gequetsten sere profiteerde ende nutte was. Ende op dien dach vertrocken die princen ende togen doer Beauffe⁸⁵, ende sceepten over die Zeyne tot Moreth in Gathmees, dat een stedeken is gelegen op te rivire Jocie, dair hem te moet quamen die hertoge van Calabren mitten maerscalcke van Bourgondien, mit een groot heer van volc. Die cause ende sake waerom dat dese princen ende heren tesamen quamen, was dese: om den coninc te bedwingen te voldoen sinen broeder den hertoge van Berry ende meer andere princen, daer hi toe obligeert ende verbonden was. Die coninc Lodewijc vernemende deser princen ende heren toecoemst, sant CCCC glavyen om hemluden te wederstaen, dat si niet over die rivier comen souden; want die bruggen overal gebroken waren. Mer dese heren wederstonden se vromelic ende verjaechden se, datter vele geslagen werden; ende si quamen over de rivier, ende beleiden die stat van Parijs XI weken lanc, bestormende ende scietende dagelicx mit grote bussen ende andere instrumenten in die stede; ende dye grave van Charloys lach op tcasteel van Conflans, dat sijn vader toebehoirde, leggende op die Zeine. Dit belegge voer Parijs gedurende, sonden die hertoge van Berry ende die hertoge van Bertangen sommige archyers ende volc van wapenen voer die stede van Pontoyse, daer si bi composicie binnen quamen. Daerenboven vercreech de hertoge van Bourbon selver in persone, bi composicie doer die wedue des drossaets van Normandien, die tot Montlehery mede geslagen was, die stede ende tslot van Ruwaen. Dit horende die coninc, verduchte seer dat hi sijn conincrijc verliesen soude, begeerde pays ende vrede, sendende sine legeaten ende ambassaten, belovende te doene alle dat hi van rechtswegen ende bi notabele mannen sculdich ware te doen, ende beval den last hierof den grave van Charloys, te disponeren ende ordineren des rijcs saken, ende een ygelic te geven dat hem van rechtswegen toebehoerde, na sinen belieften. Ende hierof nam die grave behoerliken stipulacie van den coninc in tegenwoerdicheit van vele machtige princen te onderhouden ende te voldoen des graven seggen ende uutsprake. Item. In den eersten soude die hertoge van Berry, des conincs broeder, ontfangen ende van den coninc te lene houden dat hertoechdom van Normandien mit allen sinen toebehoren. Item, die coninc gaf tot enen vrien eygen den grave van Charloys alle die landen ende heer-

85 Beanffe ABC; dr Tilmans kiest Beaniffe.

[p. 307r]

licheden, die die voorscreven coninc gecoft hadde bi den here van Croy van hertoge Philips van Bourgondien, sinen vader, rustelic ende vredelic te besitten, ende daertoe dese steden, als Pyrone, Roye ende Mondidier, ewich ende erflic voer hem ende sine erven te besitten, mit allen horen toebehoren. Item, noch die graefscappen van Bolonoys ende Ghisen, welke graefschappe van Ghysen dye coninc te voren gegeven hadde den here van Croy; mer hi mostet rumen. Daerenboven vercreech die grave noch van den coninc dat dye here van Croy mit sine kinderen, die here van Rymay mitten sinen ende den here van Lannoy mit allen horen adherenten uut der cronen van Vrancrijcke gebannen worden, ende dat se die grave soude mogen vervolgen tot allen plecken in Vrancrijc, te vangen ende hoer goeden te nemen sonder wederseggen van den coninc. Dese here van Croy was hertoge Philips van Bourgondien overste raet ende doer sinen believen worden alle saken van den hove getracteert ende gehandelt; ende doer sine cloecheit ende wijsheyt hadde die hertoge conquesteert ende vercregen die landen van Brabant, Limburch, Lutzenburch, de graefscappen van Hollant, Zeelant ende Vrieslant, ende van Namen. Nochtans, als men seide, was hi diegene, die alle desen twist ende discoorde maecte tusscen den hertoge ende sinen sone, waerom dat hi uut allen desen landen gebannen worde; daer die hertoghe sere droevich om was, want hi hem sere beminde. Dit waren nu die princen, heren ende vorsten die mitten grave van Charloys verbonden waren tegen den coninc van Vrancrijc: Die hertoge van Berry, des conincs broeder. Die hertoge van Humayne, des conincs oem, die hem sere neutrael hilt ende arbeide altijt om pays. Die hertoge van Calabren, coninc Reynierssoen van Sicilien. Die hertoge van Bourbon. Die hertoge van Bertangen. Die prins van Nemours. Die grave van Labrecht. Die grave van Armeniac. Die grave van Loyacht. Die grave van Buel. Die grave van Savegijm. Die grave van Simpol. Die grave van Dommartijn. Alle dese princen ende heren worden begaeft van den coninc doir uutsprake des graven van Charloys. Dit aldus wel gedisponeert ende volcomen wesende, bereide hem die grave te keren na sinen landen. Ende die coninc mitten anderen heren quamen tot Sinte Anthonis, misse te horen ende na der missen ghingen si tesamen eten. Ende de coninc gheleide den grave tot int dorp Tebel, ende daer bleven⁸⁶ si bi malcanderen IIII dagen lanc ende bedreven grote feeste ende bliscappen, also dat men meenden dat si nimmermeer weder vianden geworden souden hebben, om der groter aliancie ende vrientscappe die si malcanderen thoenden; ende dicwils vermaende die coninc dat hi ter werlt op niemant betrouwen en hadde dan alleen opten grave van Charloys, ende sceiden mit desen vrientliken ende minliken vaneen.

86 blenen AB.