Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat Kaerle, grave van Charloys, gehult ende ontfangen wert in die halve heerlicheit van Asperen.
Dat XXXV capitel.

In ditselve jaer van LXI wert Kaerle, graef van Charloys, here van Bethunen, Castrebelijn, Arckel, Putten ende Stryen, ende van Goylant gehult ende ontfangen in den persone here Adriaen van Borselen, here van Brigdam, als een here⁶⁸ in die helfste van der heerlicheit, stede ende slot van Asperen; ende doer enen dootslach, die geschiede, so quam ende devolueerde die rechte helft van der heerlicheit voorscreven opten grave Kaerle van Charloys, als here van Arkel; want die heerlicheit van Asperen uuten huse van Arkel gecomen ende gesproten was. Die sake waerom was dese: Die stede mitter heerlicheit van Asperen behoirde op die tijt toe die ene helft here Rutger van Boetselaer, here van Langeraec, ende dander helft behoerde joncheer Aernt Pieck van Beesdam. Ende elc hadde sijn slot ende casteel staende in der stede van Asperen. So is ten lesten een grote discoorde ende twedracht tusscen hem beyden opgestaen ter cause van sommige sekere renten. Nu hadde dese here Rutger sijn slot staende an dye noortsyde van der stede, dwelcke hij te lene hilt van joncheer Aernt Pieck voorscreven. Ende joncheer Aernt Pieck hadde sijn casteel staen an die zuytside van der selver stede. Ende als si tesamen dese heerlicheit ende hoer goeden rustelic ende vrelic lange tijt gemeen hadden gebruyct, ten lesten so versmade dese here Rutgeer den joncheer Aernt Piec ende usurpeerde ende benam hem mit fortsen doir sinen rentemeester die profiten van der molenmaet, van thienden ende andere sekere renten, ende nam meer dan hem van Goeds ende rechtswegen toe behoerde. Joncheer Aernt nam dit qualicken, ende dede dit dicwils vermanen ende te kennen geven bi sinen rentemeester⁶⁹ den voorscreven here Rutgeer, wat cracht ende gewelt hem van sinen rentemeester gesciede; mer here Rutgheer dissimuleerde ende en achtes niet. Joncheer Aernt claechde dese violencie ende gewelden sinen vrienden ende magen, begerende dat si den voorscreven here Rutgeer informeren wilden op te houden van alsulcke usurpacie ende crachtige beroevinge sijnre goeden ende renten. Ende also here Rutger dit al noch niet en achte, ende niet op en hilt van sinen voernemen, so quam een sijnre neven, genoemt Willem van Buyren, ende woude an here Rutgeer wreken dat hi sinen neve sulken gewelt gedaen hadde; want joncheer Aernt ende dese Willem waren II suster kinderen van een dochter van Accoy. Soe quam op ene margenstont dese Willem van Bueren mit sommige gewapende voer tcasteel van Asperen, daer here Rutgeer op was, om dat subtijliken in te nemen, ende desen here Rutgheer te vanghen oft te slaen. Ende quam over die brugge int voerburch van den slote, tot voer die grote poorte van tslot, ende woude die mit crachte opdoen, om daerop te comen. Here Rutgheer quam ghelopen ongewapent, mit sijn dienres, ende bewaer-

68 hrre AB.

69 rentemeesteer AB.

[p. 301v]

den die poorte als si best mochten, dat dye andere niet opcomen en mochten. Als Willem sach dat hi dair niet op comen en mochte, scoot hi mit eenre knipbusse desen heren Rutgheer doot, ende liep mit alle sine adherenten ende knechten op joncheer Aernts slot, sinen neve, staende an dander siden van der selver stede. Ende hoewel dese joncheer Arent Pieck hier niet of en wiste, noch daertoe consent gegeven en hadde, ende was des qualiken te vreden dat die dootslach gheschiet was; mer want hi dese dootslagers op sinen huse ontfangen ende onthouden hadde, so worden alle sine goeden gheconfisceert ende bi sentencie rechtelic benomen ende worden den grave van Charloys toeghewesen als an horen overhere, als here van Arckel, daer si of gecomen waren. Als dese dootslach openbaer worde, quam terstont⁷⁰ die here van Bredenroede, mitten domproest, sinen broeder, mit CC scutters uuter stat van Uutrecht, mitten procureur generael van Hollant, ende beleiden dat slot daer joncheer Aernt Pieck op lach. Ende want die borchsaten onderlinge twistende worden, ende Willem van Bueren merckende dat hi hem daer niet veylich onthouden en mochte, so dede hi op een tijt op enen middachstont die poorten open, ende meende haestelic te lopen van den huse tottet cloester van den Crucenbroederen, om daer salveert te wesen. Mer eer hi int cloester conde gheraken, wert hi van die van Uutrecht gevangen, ende die procureur generael brocht hem gevangen in Den Hage, ende wert dairna onthoeft ende totten Jacopinen int cloester begraven; ende alle sine medegesellen die men crigen mochte, worden op raden geset. Hierna, overmits een huwelic, worden joncheer Aernt Pieck ende die kinderen des heren van Boetselaer versoent ende verenicht; sijn sonen waren jonckheer Wessel, ende heere Ghijsbrecht, dye een monick tot Egmont was, ende noch een heer van der Duytsscher Oerden tUytrecht.

70 aldus B; terstout A.