Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat coninc Henric van Engelant, die VI, gevangen wert, ende hoe hertoge Eduwaert van Jorcke coninc ghemaect worde.
Dat XXXIIII capitel⁶⁴

In den jare M CCCC LXI is een grote dissencie ende twedracht opgestaen tusscen coninc Henric van Engelant de VI ende hertoge Rychaert van Jorcke, waeruut dat vele oerlogen ende bloetstortinge gesciet sijn. Want dese hertoge Rychaert wert gevangen van den hertoge Huytfrijt van Excester sinen swager, ende die coninc dede hem scandeliken onthoefden mit meer andere heren, ridderen ende edelen diet mit hem hilden. Doen quam hertoge Eduwaert, des voorscreven hertogen Rychaert outsten soen, ende nam in sijnre hulpen sijn II broeders, Jan ende Rychaert ende grave Rychaert Nevel van Werwijc, mit Thomas sinen broeder ende meer andere heren ende princen van der cronen, ende voert alle die Duytschen die int conincrijc waren, ende sette hem vromelic dicwils te striden tegen den coninc Henric van Engelant, den hertoge van Zommerzeth, den hertoge Huytfrijt van Excester, ende tegen den here van Rymers, fautoers ende hulpers des voorscreven conincs. Ende die hertoge Eduwaert creech int einde victorie, ende vinc den coninc Henric van Engelant, ende sette hem in sekere hoeden ende vaste vangenisse, ende verdreef ende verjaechde die coninghinne mit horen soen Eduwaert, prince van Waels, ende den hertoge van Zommerseth ende den hertoge van Excester uuten conincrijke. Mer die here van Rymers, die quam tot ghenade, ende creech sinen pays mitten hertoge Eduwairt, ende bleef hem voertan getrouwe. Die hertoge van Zommerseth⁶⁵ quam bi hertoge Phillips van Bourgondien, sinen neve, ende hilten bi hem mit enen bequamen ende betameliken familie ende staet. Die hertoge van Excester quam tot Uutrecht ende onthilt hem daer een wijl tijts ende

64 Hoofdstuk 33 ontbr. AB.

65 Zommerth AB.

[p. 301r]

vandaen toech hi binnen die stede van Breda. Die coninginne mit horen zoen Eduwaert, prince van Waels, toech in Vrancrijc bi coninc Reynyer van Sicilien, horen vader. Dese⁶⁶ aldus altesamen verdreven wesende, brochte hertoge Eduwaert dat conincrijc mit groten striden ende oerlogen onder sine subjectye ende onderdanicheit, ende wert mit machte gecroent coninc van Engelant, ende wert genoemt coninc Eduwaert die IIII; ende als hi aldus int conincrijc verheven was, maecte hi Jan, sinen broeder, hertoge van Clarence, ende Rychaert, sinen joncsten broeder, maecte hi hertoge van Cloucester; mer dat hertogedom van Jorck behilt hi an hemselven. Sinen suster, des hertogen Huytfrijts gheechte wijf, gaf hi by dispensacie des paeus enen anderen man te huwelic, ende Margriet, sijn andere suster gaf hi te huwelicke hertoghe Kaerle van Bourgondien. Hierna nam dese coninc Eduwaert ten wive des heren dochter van Rymers, ende maecte die sijn coninginne; waerdoer dat die here van Rymers int rijck sere verheven wert, ende hadde grote audiencie bi den coninc, ende vermaecte sere in des conincs ogen den grave Rychaert van Werwijc, dat die coninc hem seer suspect hadde; waeruut dat namaels grote oerlogen opgeresen ende grote bloetstortinge gesciet sijn⁶⁷ als na geseyt sal worden.

66 aldus C; Doe se AB.

67 ontbr. AB.