Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die grave van Charloys gehult ende ontfangen werdt voer enen here van Hoekelom.
Dat XXXVI capitel.

Des jaers daeran, als M CCCC LXII, werdt dye moghende prince Kaerle, grave van Charloys, in sijnder eygender personen gehult ende ontfangen in die heerlichheit van Hokelom; ende dit was op Sint Jans Baptisten dach Onthoefdinge, ende geschiede opten huse ende sale van Hokelom. Dye sake waerom dat die here van Hoekelom, Lonen ende Vogelenwerf die heerlicheit van Hokelom verloren ende quijt geworden sijn, is dese: joncheer Jan van Hoekelom, Lonen ende Vogelenwerf, die van den rechten stamme ende linie der doerluchtigen heren van Arkel gedescendeert ende nederghedaelt waren, ende hi was die VI comende van here Jan van Arkel, die te wive hadde vrouwe Baerthe, des graven dochter van Archom; dese joncheer Jan, als qualic beraden wesende ende oec mede want hi des macht hadde, plach te slaen ende munten cleine pennincxkens, ghelijken sine voervaders te doen plagen, mit sinen name ende wapen. Ende ten lesten sloech hi dieselve munte ende die valsch onder den name van hertoge Phillips van Bourgondyen. Ende als hi des goetlic ende dicwils vermaent worde om sulke dingen niet te doen, ende daerom niet oflaten en wilde, wert hi ten lesten van den Raet van Hollant daerof verwonnen. Ende dit en soude hem al noch niet gehindert hebben, want hi daerna quam tot Gorichom, bi Kaerle, grave van Charloys, als here van Arkel, ende revoceerde die valsche munte, ende wert van den grave vrientlic ontfangen ende minlic getracteert. Mer dese joncheer Jan van Hoekelom hadde enen enigen soen, genoemt joncheer Otte van Hokelom, ende was heren Gerrits suster soen van Culenburch. Dese joncheer Otte van Hoekelom quam mit gewapender hant mit sommige van Culenburch in die stede van Hokelom, ende vinc sinen vader, joncheer Jan, ende brocht hem gevangen tot Culenburch, ende hi nam die possessie van der stede ende slote van Hokelom. Ende men seide gemeenlicken dat dese joncheer Otte die heerlicheyt van Hokelom geresigneert ende overgegeven hadde here Gerrit van Culemburch, sinen oem, om een deel percelen van landen ende renten; ende also die heerlicheit van Hokelom een Hollants leen is, ende men dat van der graeflicheit van Hollant te lene hout, so hout men dat slot van den here van Arkel te leen. Ende also dese jonc-

[p. 302r]

⁷¹ heer Otte mits hulpe ende bystant sijns oems, here Gerrit van Culenburch, sommige zoudenyers ende gewapende geordineert ende geset hadde in die stede ende op tslot van Hokelom, diewelke daeruut dagelicxs infesteerden ende scadichden den ingeseten van Hollant ende des lants van Arkels, ende deden daeruut veel quaet op die ommegeseten dorpen, ende maecten van dat huys een roefcuyl der dieven ende moerdenaers; ende also hi mede sinen vader inhonesteert ende scandelic gevangen genomen hadde, beroevende hem van sine heerlike goeden buten consent ende wille sijns oversten leenheers; waeromme dat doer bevele des graven van Charloys gecomen is die drossaet van Arkel des nachts opten Aschelen Woensdach, met sommige poorters van Gorichom, ende quam mit scepen gevaren voir die stat van Hokelom, ende quam⁷² dairbinnen ende vingen joncheer Everwijn, des heren broeder van Culenburch, mit Sweer, den bastert van Culenburch, sinen broeder, mit meer andere, die si gevangen brochten binnen Gorichom; ende setten die op hoer sekerheit ende gelove in die herbergen van der stede. Dairna wert een tractaet gemaect, als dat joncheer Gerrit van Culenburch ende joncheer Otte van Hoekelom resigneerden ende gaven over tot behoef des graven van Charloys, here van Arkel, die stede, slot ende heerlicheit van Hokelom, ende quam weder an sinen oversten here, als an den here van Arkel, dairt wilen eer of gecomen was; ende mits deser composicie worden die vader ende die sone beide priveert ende beroeft van hore heerlike goeden, ende die grave van Charloys wert gehult ende ontfangen voir een recht here van Hoekelom.

71 CC XCIX AB.

72 qnam AB.