Van dat oerloge datter op stont tusscen die van Uutrecht ende Amersfoert.
Dat XXXI capitel.
Op dese tijt onthilt hem die bisscop op tslot Ter Horst; ende daer waren vele ghebannen burgeren uut Uutrecht binnen Amersfoert. Waerom dat een grote twist ende twedracht opgestaen is tusscen die stat van Uutrecht ende die stede van Amersfoert. Op een tijt ghingen die van Uutrecht uut voir Amersfoert, bedrivende daer veel wils ende hoemoets, scietende dat vier in die stede, dat byna die Nyewe Stede daerof verbrande. Die biscop dit vernemende, quam haestelic binnen Amersfoert; ende doe togen die van Uutrecht weder om. Ende het bleef vast een ryende oerloch tusscen die van Uutrecht ende Amersfoert. Die overste cappeteinen van Uutrecht waren die heren van Bredenroede, here Ghijsbrecht van Bredenroede, sijn broeder, dye domproest; joncheer Henric van Montfoerde, burchgrave van Uutrecht, mit meer andere edelen ende sciltknapen; ende van desen twedracht gescieden dagelicxs vele scaden van roven ende pilgeringe. Dair worden vele tractaten ende dachvaerden gehouden om pays ende vrede te maken. Mer daer en quam niet of, want die biscop woude dat die ballingen incomen souden, ende dat en wouden die regenten van der stat in geenre manieren admitteren noch toelaten.
Des jaers daeran ghingen die van Uutrecht uuter stat mit een groot volc van wapenen, ende sloegen een groot starck blochuys op die Eme, ende setten daerop enen cappeteyn genoemt Willem van Wye, mit een deel vromer cloecker soudenyers. Dit gedaen sijnde, quam here Anthonis, die bastert van Bourgondien, biscop Davids broeder, mit M paerden int Sticht van Uutrecht, om sinen broeder assistencie ende bystant te doen. Ende dede terstont die stat mit open brieven ontseggen, ende quam mit alle sijn volc op die Bilt; ende verbrande daer sommige husen. Die van der stat dit siende, togen mit alle hoer macht uut; mer die bastert reisde mit alle sijn volc binnen Amersfoert, ende corts dairna wert de pays gemaect. Mer die ballingen mosten uuter stat bliven. Daerna, int jaer M CCCC LIX, starf joncheer Jacob van Gaesbeeck; ende bisscop David nam die possessie ende tbesit van der stede van Wijck te Duersteden, ende quam op dat slot, doende dat sere verbeteren ende vertimmeren ende sere starck maken, ende bleef dair voertan dat meeste deel sijns levens wonende ende residerende.
Item. Int jaer M CCCC LVIII werdt ghefondeert ende gesticht dat cloester tot Heemsteden buten Haerlem van Sinte Bernerts Oerde, van den eerbaren mannen meester Huge van Assendelf ende meester Jan Claessoen priesteren.
Auteursrechtelijk beschermd