Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die heren van den gerechte van Haerlem excysen hebben wouden van die gheestlicheit, ende hoe die burghemeester ende schepen van Haerlem dootgheslaghen worden.
Dat XXX capitel.

In den jare M CCCC ende LVII, die regenten ende heren van den gherechte van Haerlem aggraveerden ende beswaerden sere die gheestlijcke luyden van der stede, eysschende ende willende van hem hebben tollen ende excysen, gelijken van haer poorters. Ende daer worde een proces van rechte tegen henluden gemaect, doer den bisscop van Uutrecht oft sinen fiscale als sijn procuratoer. Ende want die gheestelicke luyden, priesteren ende clercken doer desen processe dye noch nyet gheven en wouden, so worden geordineert van der stede wegen van Haerlem Claes van Yperen,

[p. 299v]

burgemeester, ende Gherrit van Noortwijc, scepen, ende Willem Paeds, secretarius der voorscreven stede, dat si souden trecken tot Amersfoert by den bisscop, om te impetreren een mandaet van den biscop tegen die geestelicheit, om mitsdien hen te dwingen die excysen ende tollen te geven. Ende sittende op een wagen, comende bi Uutrecht op die Bilt, om te reysen na Amersfoert, siet, so quam daer ghereden Walraven, die bastert des heren van Bredenroede mit sinen reysighers; ende sloegen daer doot, datter die here van Bredenroede niet of en wiste, den burgemeester ende den scepen beide voorscreven. Dese II voorscreven hadden wilen eer mit den scout van Haerlem, Aelbrecht van Raephorst, wat onmanierlic ende scoffierlic tegen desen Walraven gehat int dorp van Santvoert, om saken willen, daer hem sijn here vader om gesonnen hadde; waerom hi op hem luden gram ende verstoert was, ende hadde die scout daer mede gweest, hi souden mede geslagen hebben; om welker feyten wille die here van Bredenroede sere droevich was, ende en woude den bastaert, sinen sone, in langen tiden niet sien. Dese tidinge binnen Haerlem comende, was daer grote droefheit ende beclaechden sere desen II personen; ende uut desen so lieten die ander van der stede haer quade opinien ende voernemen of, ende lieten die geestlicheit bliven in hoir oude gewoenten ende in vreden, want God die Here seit: 'Die u raect, die raect Mi.' Dit gesciede opten X dach in aprille, int jaer voorscreven; ende X jaer hierna worde dese dootslach gesoent.