Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Dat XXVII capitel.
Hoe dat here David van Bourgondyen geintroniseert ende ingeleit wert in dat bisdom tUtrecht ende was die LV biscop.

Hertoge Phillips in Den Hage legghende, dede over al Hollant gemeen heervaert bieden, om sinen soen, here David, mit machte in der possessyen van den bisdom te brenghen, ende is ghecomen binnen Leyden op Sinte Marien Magdaleenen dach, ende bleef aldaer leggen VIII dagen lang, mit alle sine heren ende edelen. Ende binnen desen tiden is bi hem gecomen op goeden vasten geleyde die here van Bredenroede, des elects broeder; ende sende voer hem den burchgrave van Montfoerde mit XXV paerden. Ende des anderen dages quam die here van Bredenroede mit C paerden. Des dages daeran quam die here van Bredenroede, mitten hertoge van Cleve, mitten burchgrave van Montfoerde, mitten domdeken ende Jacob Preus, sijn broeder, ende spraken mitten prince; mer si en konden niet accorderen. Waerom dat die here van Bredenroede wederom na Uutrecht reysde tot sinen broeder, den elect; ende die hertoge toech na Woerden, ende vandaen tot Yselstein. Daer wesende quamen bi hem grave Kaerl van Nivers, grave Jan van Stampus, Anthonis, sijn bastert soen, mit veel gewapents volcs uut Vlaenderen, Artoys, Henegouwen ende uut Brabant. Noch waren daerbi den prince⁵⁷ Kaerl, grave van Charloys, sijn soen; hertoge Jan van Cleve; Jacob, hertoge Kaerls soen van Bourbon; Adolf van Cleve, here van Ravenstein, des hertogen van Cleven broeder; grave Jan van Marle, grave Pieter van Brianen, sijn broeder, des graven van Simpols sonen; Wolfert, grave van Bocham, here Henricx soen van der Vere; here Jan van Croy; here Jan van Crycki; here Jan van Lannoy, stathouder van Hollant; here Willem van Egmont; here Jan van Wassenaer, mit meer andere baroenen, ridderen, heren ende vrome schiltknapen⁵⁸. Die hertoge van Cleve began wederom sere naerstelicken te tracteren om enen vrede te maken, ende reysde tUtrecht ende presenteerde uuten name van den hertoge here Ghijsbrecht, den elect, vele scone

57 priuce AB.

58 schiltkapen AB.

[p. 298v]

dingen ende compromissen indien hi resigneren woude sine electie van den bisdom. Die elect overleyde dye sake, ende mercte dat hi alsulcken machtigen prince niet wederstaen en mochte, ende dat here David alrede die steden van Amersfoert ende Renen mittet huys Ter Horst in hadde, ende dat hem een scone dadinge geboeren mochte, began te ausculteren ende te luysteren, ende namt ter herten dat hem gepresenteert ende geboden wert. Ende opdat alle dingen vast ende gestade wesen souden, sende die elect sinen raet totten hertoge, als den here van Bredenroede, sinen broeder; den joncheer van Montfoerde; here Jan van Renesse, van Wulven; here Jan Proeijs, domdeken, ende Jacob Proeys, sinen broeder, ende alle dinc wert wel voersproken. Ende tot Yselstein wortet gesloten in aldusdaniger manieren: Als dat here Ghijsbrecht van Bredenroede, die elect, sine electie ende dat bisdom resigneren ende overgeven soude here David, den bisscop van Terewaen, die die provisie van den paeus hadde; ende here Ghijsbrecht van Bredenroede, die soude bliven ende wesen domproest ende proest van Oude Monster tUtrecht; ende hi soude wesen proest tot Sinte Donaes tot Brugge; ende hi soude hebben alle jaer, also lange als hi leefde, uuten bisdom van Uutrecht, IIII M ende CC Rijnsche Ghuldens jaerlicx; ende hi soude hebben voir sine costen die hi gedaen hadde, ende voir sine uutgeleide ghelden L M Leeuwen; ende voer al dit voorscreven wert die hertoge van Cleve borghe. Ende op aldusdaniger voerwaerden ende op groter gelove quam die mogende vorst hertoge Phillips van Bourgondyen mit sinen soen, den biscop David, in der stadt van Uutrecht, mit alle sijn volc, daer hi mede voer dye stat gecomen soude hebben. Ende quamen mit groter costlicheit ende chyerheit in der stat van Uutrecht, daer dye hertoge ende dye biscop mit groter eren ende reverencie ontfangen werden. Ende here Ghijsbrecht van Bredenroede ontfing den biscop selve ende resigneerde hem over die possessie ende alle ding, alst voersproken was. Ende hij heeft here David mit alle die ecclesie ende geestelicheit selver ingeleyt in Sinte Martijns Domkercke, ende heeft hem gheset in des bisscops stoel, dat sere minlic was om te sien; ende daer swoer ende beloefde hi te onderhouden des stats priviligien ende vryheden, als dat gewoenlic is; ende wert gehult ende ontfangen als een heer ende biscop van Uutrecht. Ende als hertoge Phillips van Bourgondyen aldus in der stat van Uutrecht was, mit so groter macht van volcke, dat hi der stat wel machtich was, so heeft hi volcomeliken, als een gelovich warachtich edel vorst sijn geloef wel gehouden, ende en⁵⁹ heeft die stadt nerghent in vercort noch misdaen.

59 een AB.