Hoe dat here David in creech sommige steden ende sloten gheleghen int Sticht van Uutrecht.
Dat XXVI. capitel.
In den jare M CCCC ende LVI, als nu die hertoge vercregen hadde van den paeus die provisie van den bisdom van Uutrecht op heere David, biscop van Teruwaen, sinen natuerliken soen, so sijn sommige uuter steden van Amersfoert ende van Renen, ende mit enige dye uuter stat van Uutrecht geweken waren, gecomen in Den Hage, ende maecten alsulken conspiracie ende verbant mitten hertoge ende sinen soen, here David, dat dieselfde here David doer believen sijns heren, den hertoge, sende den here Adriaen van Borselen, here van Brigdam, (die te wive hadde Anne, hertoge Phillips voorscreven natuerlike dochter) mit desen poorters om die voorscreven II steden te occuperen ende in te nemen, dwelke also gesciet is. Die casteleyn van der Horst dit vernemende, ontboet den here van Brigdam: woude hi hem weder doen hebben die VII M Rijnsche Gulden die hi opt slot ter Horst beleent hadde, hij woude hem dat slot openen tot behoef heren David van Bourgondien; ende hi gecreech sijn penningen, ende die here van Brigdam nam die possessie van den huse, tot behoef heren Davids. Daerna quam here David mitten here van Wassenaer ende mit veel volcxs van wapenen tot Gorichom, daer hi eerlick ende feestelic ontfangen wert van alle den ingesetenen van der stede. Vandaen reysde hi tot Tyel, ende van Tyel quam hi tot Renen, daer hi eerlic ende triumphelick ingehaelt, ontfangen ende gehult wert, als men enen biscop ende here van Uutrecht plach te doen. Ende dierghelicken deden die van Amersfoert mede.
Auteursrechtelijk beschermd