Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die hertoge die stede van Deventer beleide ende hoe dattet gedadinct wert.
Dat XXVIII capitel.

Ende als dye hertoge achte dagen binnen Uutrecht gelegen hadde, beval hi den here van Bredenroede, burchgrave van Uutrecht, ende here Ghijsbrecht, den domproest, sinen broeder, die stat te bewaren ende te regieren. Ende hij reysde mit alle sijn volc voer Deventer. Dye grave Kaerle van Charloys reysde weder na Brabant ende here David, biscop van Uutrecht, toech opt huys ter Horst. Ende also dye van Deventer den biscop David voer horen here niet ontfangen en wouden, so heeft die hertoge die stede al omme belegen, ende dede bi hem comen veel volcs van wapenen uut Hollant ende Zeelant. Ende deelde sijn heer in III scaren ende battaelgen: den enen beleyde hi ende sloech sijn tenten ende pauwelioenen op in een plaetse geheten die Wilpe. Die Hollanders ende Zeelanders hadden haer tenten opgheslagen an die zuytsijde van der stede, op een eylant van der Yselen geheten Vennoort. Ende biscop David dye beleyder was van der derden battaelgen dede sine tenten opslaen an die westside van der stede. Omtrent die stede stont getimmert een groot stenen huys, daer die wakers ende harders van der beesten des nachtes haer beesten in wachten ende hoeden. Dit huys hadden die van Deventer omme doen begraven ende bewallen mit enen hoghen groten walle ende hadden dat bebolwerct ende vast ghemaect, ende versien mit volc van wapenen mit gescutten ende ander artelrye ende instrumenten

[p. 299r]

van oerlogen ende van allen des hem van node was. Die opten huse waren, arbeyden sere met gescutte ende anders dat heer van der stadt te weren ende die stat te bescermen ende dair of te slaen; mer ten mocht hem niet baten, want die biscop mit sine battaelgen scoten ende worpen so vreseliken op dat huys mit grote stenen ende cloten, dat die mueren an allen kanten bestonden te scoeren ende te vallen, waerom die burchsaten dat huys niet langer houden en dorsten, ende staken dat vier dairinne ende lietent branden, opdatter die van binnen geen hinder of en quame, ende si quamen ongeschent binnen Deventer. Die hertoge mitten Hollanders stormden ende scoten met grote bussen ende andere instrumenten sonder ophouden op die stat van Deventer, ende quetsten die van binnen mit allen seer, destruerende poorten, muren ende toernen; ende alsoet alle den tijt dach bi dage ongetempert weder was van regen ende winde, so en vorderde die prince niet vele. Waeromme dat die hertoge van Cleve een zoen ende dadinge tusschen sinen oem den hertoge ende der stadt van Deventer maecte op deser condicien: Als dat die stat van Deventer mitten anderen Overyselschen steden den biscop souden ontfangen ende hulden als dat gewoenlic was; ende die Overyselse steden ontfingen ende hulden bisscop David voer horen here ende biscop. Ende dat gedaen wesende, toech de hertoge weder na Brabant. Dit belegge duerde omtrent VIII weken lanc, ende was int jaer XIIII C LVI. Die Hollanders braken hoer belegge mede op ende voeren die Ysele neder; ende want si sere verscheiden ende ongeordineert reysden, worden si een deel tusscen Aernem ende Doesburch van sommige hoefscappen ende heren gevangen, die hoer husen ende uuthoven op die Velue ende omtrent Deventer hadden. Ende dese gevangen worden sere gescat ende mosten grote sommen van penningen geven, souden si uuter vangenissen comen; waeromme dat namaels een grote twist ende twedracht tusschen den Hollanders ende dye van Deventer op ghestaen ende gheresen is.