Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van die rebelheyt der Waterlanderen tegens den prince, overmits die bede, die hem gheconsenteert was, ende hoe si daeromme ghepunieert ende ghestraft worden.
Dat XV capitel.

[p. 292r]

Hierna, in den jare M CCCC ende XLVII, hebben hem die dorpen van den Waterlanders geset ende rebelleert tegens den here van den rade in Hollant. Die sake waerom was dese: overmits sonderlinge saken, was den prince geconsenteert een bede van den gemenen landen. Nu waren enige van den notabelsten gedeputeert de dese penningen ordineren ende taxeren souden na die grootheit ende rijcheit van den landen, ende worden alsdoe die Waterlanders hoger getaxeert ende geset in den contribucie van der bede, dan si tevoren plegen te gheven. Dit vernemende die Waterlanders wouden geensins consenteren, allegerende haer armoede ende groten scade die si overmits die grote wateren van den inbreken der dycken geleden hadden. Dit en mocht hem al niet helpen, ende worden mit mandamenten daertoe gedwongen, om dese penningen te geven; mer waren also mit een gesloten ende geconcludeert, dat si niet meer gheven en wouden dan si te geven plegen. Die stedehouder ende heren van den rade sloten eendrachtelic dat men se met crachte ende by machte van volcke daertoe dwingen, ende dat men haer rebellie also castyen soude, dat andere daer exempel an nemen souden; wairom here Jan van Lannoy, stedehouder generael van desen landen, dede over al Hollant heervaert gebieden, ende vergaerde vele gewapents volcs uut allen steden ende dorpen van Hollant; ende togen mit groter machte, ende vingen vele goede mannen van den rijcsten ende notabelsten, ende brochten dye in Den Hage gevangen, ende mosten daer te ghysel leggen totter tijt toe dat die penningen van haren contribucie ende ommeslach van der bede betaelt waren. Ende als si een wijl tijts daer gelegen hadden, bestontet hemluden ende hore vrienden te verdrieten, ende versochten an den heren van den rade om hoer gevangen weder uuter gysele te hebben; ende presenteerden te geven alle dat men hem eysschende was, ende gaven noch boven haer portye van der bede also groten somme van penningen, dat men noch ene scone camere by den Raetcamere daermede dede timmeren. Ende mosten noch die gevangen in den name van allen den Waterlanders gaen in linden clederen in der generale processie voer dye crucen, die doe in Den Hage gesciede; ende also mi in der waerheit geseyt worde van enen genoemt Simon Jans soen, dattet den tijt van der processie sere regende, mer op den gevangen die in linden clederen ghingen en viel nye regen noch water