Hoe dat die president van Hollant, meester Goeswijn de Wilde onthoeft worde, ende een andere in sijn stede geordineert worde, ende van een grote tempeest in der lucht opten Palmsonnendach.
Dat XIIII capitel.
Daerna weynich tijts int jaer van XLVI, heeft meester Goeswijn dye Wilde, president van Hollant, enen groten nijt begrepen opten casteleyn van Medenblic, genoemt Banyaert, ende seyde hem op dat hi enen man vermoert soude hebben. Banyaert die casteleyn besculdichde desen president weder mit een lelicke sake tegen der natueren. Van welcker twedracht een groot rumoer ende commocye in Hollant opgestaen is. Ende elc van desen II hadden fautoren ende adherenten dye hem bistonden ende excuseerden, om welcker saken willen hertoge Phillips enen notabelen ende edelen ambassiaet genoemt here Jan van Lannoy, geboren uut Henegouwen gesonden heeftGa naar voetnoot37, denwelcken hi gaf volcomen auctoriteyt ende commissie om naerstige diligencie ende inquisicie te doen op die voorscreven excessen van den voornoemde personen. Here Jan voorscreven, comende in Hollant, ende anhorende die accusacien ende besculdigen van den partien, vernam ende verstont wel dat hem van node was cloekelic ende behendelic in deser saken te procederen. Ende heeft meester Goeswijn, den president, ende Banyaert, den castelein, gevangen ghevoert op thuys te Hoesden, om daer perscrutacy ende naerstich ondersoec te mogen doen. Ende anhorende die accusacien van den partien ende van elcx bysonder, accuseerden ende besculdichden si elcxs die ene den anderen mit alle die reden ende bewisingen die si bi brengen konden ende mochten van den voorscreven lelicken saken. Ende die castelein is bevonden gheweest een man dootgheslagen te hebben, mer niet in manieren van moort, ende examinerende den voerscreven president en konden si niet determinaet van hem weten oft hem vinden, mer niettemin hilden si hem nochtans seer suspect ende sculdich, overmits die merckelicke bewisingen ende documenten tegen hem gedaen wesende. Ende als dese sake dus een jaer ende een half gestaen hadde, dede hi den president brengen van tslot te Hoesden op thuys te Lovenstein, ende werdt daer in vangenissen gehouden. Ende daer wesende, also men gemeenliken seyde, quamen die inquisitoers ende ondersoekers weder tot hem, ende stelden hem op sijn vrien voeten onder den blaeuwen hemel; ende thonende hem een groot barnende vier an dene side ende een root gespreyt cleet op dander syde, ende spraken tot hem: 'Siet meester Goeswijn, en wilt ons niet langer houden gesuspendeert noch twifelende: ghi siet u doot voer u ogen, want wi weten certeyn dat ghi sculdich sijt ende moet sterven. Also ghi een eerbaer persoen altijt geweest sijt, so willen wi u ghenade doen, dat ghi moecht kiesen enen doot dien u belieft: want ist sake dat ghi u sculde belijt, men sal u onthoefden; ende en dodi des nyet, men sal u branden, want wi sonder alle twifelinge sekerlic kennen ende weten u sculdich te sijn.' Dit horende, verscricte ende vreesde sijn herte seer, ende versuchtende sprac hi: 'O lacen, mi onsalige mensch. Ic hebbe grotelic gesondicht.' Ende belyende sijn scult, seggende, dus ende dus heb ic gedaen ende geleeft. Dit gedaen ende sijn biecht gesproken hebbende, wert hi onthoeft opter selver stede. Ende die castelein van Medenblic wert vry laten gaen, blivende castelein. Ende na sijnre doot wert dese here Jan van Lannoy gemaect ende gheset van hertoge Phillips te wesen stathouder van Hollant, Zeelant ende Vrieslant.
Int jaer van XLVI voerscreven was een alten groten tempeest van winde, van regen, van hagel ende sneeu in desen landen van Hollandt, Zeelant, Vrieslant, Brabant ende Vlaenderen ende in anderen landen, die grote scade dede in kercken, husen, sloten, bomen ende vruchten. Die grote toern van der kercken tot Zutphen viel neder, ende daer bleven X luyden onder doot. Vele scaden gescieden overmits den inbreken van den dijken, daer groot volc ende vele beesten of verdroncken opten Palmsonnendach, ende was doentertijt opten thienden dach van aprille.
Auteursrechtelijk beschermd