Hoe dat dese II partyen ende secten verenicht worden.
Dat XIII capitel.
Als dit aldus deerliken was gesciet ende die hertoge dit vernomen hadde, nam hi op in Hollant te comen om dese II partyen te verenigen ende in rusten ende vreden te setten; ende quam in Hollant mitten grave Jan van Nassouwen, here van Breda, ende mit meer andere heren ende ridderen in groten getale, ende daer quam oec mede mit hem here Jan van Hensberch, biscop van Ludic, om te impetreren ende te vercrigen remissie van der misdaet des princeliken majesteyts van datghene dat die Hoecxs tegen haren prince misdaen mochten hebben, doer favoer ende gonste joncheer Ghijsbrechts van Bredenroede, domproest van Uutrecht, sinen neve, doer wiens instancie ende begeerte dieGa naar voetnoot36 biscop aldaer mitten prince mede gecomen was. Ende als die prince in Hollant gecomen was, sende hi den grave, Jan van Nassouwen, voer tot Haerlem om sine toecoemst te intimeren ende den poorteren doen weten. Ende als hi tot Haerlem quam, dede hi sine commissie, als hem bevolen was. Ende dese grave Jan van Nassouwen was gelogeert tot Sint Jans heren. Daerna quam die prince ende hadde sijn logijs tot Bertols van Assendelf bij der kercktoern. Dit verhorende here Ghijsbrecht van Bredenroede, die domproest, quam tot Haerlem, ende was mede gelogeert in den huyse dair die prince lach. Ende bi toedoen van den biscop van Ludic, sinen neve, ende den grave van Nassouwen, maecte hi pays ende vrede mitten hertoge, daer sine vianden sere om gestoert waren ende qualic tevreden. Daerna, als op Sinte Lijsbetten dach, quam die prince binnen Amstelredam ende brocht daerin alle die gebannen ende verdreven poorters van der stede; ende hi versette dat gerecht, ende sette van elcke partye II burgemeesters, als Jacob Braesman, Bertelmeeus Does, Pouwels Aelbrechts soen, ende Grebber Dircxs soen; ende daertoe noch VII scepenen, die alle dienen souden tot Onser Liever Vrouwen Lichtmisse, want men dan van ouder gewoenten weghen tgerechte te setten plach. Als hertoge Phillips, aldus van dyen stede totten anderen ghereyst, wijslic alle dinghen in goeden state policye gheordineert, ende gheset goeden pays ende vrede tusschen den twe partien gemaect hadde, is hij weder nae Brabant ghereyst.
Auteursrechtelijk beschermd