Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat dit oerloge ende twedracht gesoent worde.
Dat VII capitel.

Als dit oerloge, dat seer fel ende quaet was tusschen den hertoge van Bourgondien ende die stede van Brugghe twee jaer lange gestaen hadde, ende binnen desen tiden die hertoge mitten Engelschen versoent ende hertoge Kaerle van Orliens, die langhe in Engelant gevangen hadde gelegen, mits hulpe ende toedoen des hertogen van Bourgondien uuter vangenissen verlost was, so versochten die van Brugge mit groter instancien ende oetmoedige stadige gebeden ende supplicacien an den voerscreven hertoge van Orliens, an vrouwe Ysabele, hertoechinne van Bourgondien, hertoge Jan van Cleve, grave Kaerl van Nyevers, ende an grave Jan van Stampus, gebroederen, laborerende ende arbeyende om enen vasten pays ende zoene te maken tusscen den voerscreven hertoge Phillips ende die stede van Brugge, so worde een dach gedetermineert ende geset, tot welken dage die hertoechinne mitten voerseyden twee hertoghen van Orlyens ende Cleve binnen Brugge quam, om van den payse te tracteren; ende toende den poorters van Brugge

[p. 287r]

enen besloten cedele, seggende dat die hertoge in den eersten volbrocht woude hebben alle datghene dat daerin gescreven stont, eer dat hij van enigen payse tracteren wilde. Soe begreep dan dese cedele dat alle die cappeteinen die in dese cedele gescreven stonden, ende den hertoge ende den sinen tegengestaen hadden in desen oerloge, tot XVIII toe, ter justicien setten soude ende rechten mitten swaerde. Die poorters, die sere begeerden pays ende vrede, ende nyet en achten op die articulen van der cedele, admitteerden ende lieten toe alle dat daerin begrepen mochte wesen. Waerom des anderen dages Pieter Thent, Dyonijs Bruyn, Jacob Mesken, mit noch XV worden op een scavot mitten swaerde gerecht. Daerna so maecten dye hertogen van Orliens, van Cleve, mitten anderen princen ende heren enen vasten pays in aldusdaniger manieren ende condicien als hierna volcht: Als dat een seker getal van den notabelsten poorteren van Brugge souden den prince tegemoete gaen barvoets, mit bloten hoofde, een myle weechs, ende bidden den prince om verghiffenisse van hore misdaet. Ende als den dach gecomen was dat die prince in der stadt comen soude, deden si alle die straten ende husen costeliken verchieren mit tapezerien ende andere lakenen. Soe ghingen dan die gedeputeerde van der stede den prince tegemoet mit vele van den poorters, ende vielen hem te voeten, begerende genade van haer misdaet. Denwelcken dye prince doer den scout van Brugghe liet weder opstaen ende vergaf hen alle dat si tegen sine princelike majesteyt gedaen hadden. Dit ghedaen sijnde, ghingen alle die gheestelicke ordenen mit schoenre processien den prince teghemoet, ende leyden hem mit sange ende mit love in der stadt. Ende in der stat comende, wert hem al sulcken reverencie, ere ende triumphe bewesen, die nye tot gheenen tiden dair te voren ghesien noch gehoert en was. Ende alsoe men doen seyde, waert sake gheweest dat God dye Here selver in persone uuten hemelen daer ghecomen hadde, so en hadt men gheen groter, noch waerdigher, noch costelicker reverencie ende eerwaerdicheden mogen bewisen dan nu desen hoechgeboren vorst ende prince bewesen ende gedaen worde. Want in den inganc van der poorten stonden boven opter poorten boven C trompers, die hem blideliken groeteden, ende maecten sulken gheluyt dat dye aerde sceen te beven van den geluyde. Item, van der poorten tot in sinen palayse, dat een groot stucke weechs is, waren alle dye husen van boven tot beneden opten aerden verchiert ende behangen mit roden lakenen. Item. By der Capellen van der Colomnen Ons Heren was geordineert een batamentspul van der kinsheit Ons Heeren, dat seer devoet was an te sien. Item. Bi Sinte Ausbert kerck was een batamentspul gheordineert van der Besnidenis Ons Heeren²⁶. Item, voer dat convent van den Prekers was een batamentspul hoe dat Judas onsen Here verriet, ende hoe Hi den rechter Pylato ghelevert wert, dat seer ynnichlic ende devotelick tanscouwen was. Ende als hi quam an die Molenbrugge, was dair geordineert die Boem van Yesse, seer uutermaten costelic ende cyerlick bereyt mit die XII coningen, ende boven opten boem saten menigerlei constenaers van musyken die soetelic ende melodylicken songhen mit allerley instrumenten als orgelen, herpen, luyten, clavicordien, velen ende andere, sonder ghetal, also dattet scheen te wesen een aertsch paradijs; voer welcke plaetse dye prince mit sine heren lange tijt stille houdende bleef, verwonderende van die grote subtijlheit ende costelicheit des boems. Vandaen quam hij an den burch; ende dye poorte, daer hij doer lijden moste, was van boven tot beneden, binnen ende buyten al vergult; ende binnen stont een toerne; ende voer die doere van den thoerne ghemaect een naect kindeken, dat mitter eenre hant an die poorte clopte, doen die prince quam, ende mitter ander hant namt sijn scamelheit in die hant om den prince te bepissen. Ende doen worde den prince enen costelijken gulden croese in die hant ghegeven, ende ontfing daerin dat uuten live van den kindeken liep, dwelc was costelijcke rode wijn. Ende dye prince

26 Besmidenis Ons AB.

[p. 287v]

dranck, ende gaft voert den hertoghe van Orliens ende den anderen heren om mede te drincken. Ende dit was seer subtijllic ende constelick geordineert, mit loden pypen ende goten lopende onder der aerden. Ende als hij quam voer der Stathuys was dair geordineert een scone fontein mit eenre mueren omgaende, die an dene side vloyde, ende an dander side ebbede; ende int middel van der fonteinen stont een colonne, op dyewelcke stont een swarte Moriaen, ende hadde in sinen mont enen floeyt, daer schone witte wine uut liep; ende bi desen stont een figuer van eenre naecter vrouwen, uut welker een borste liep witte wijn, ende dandere soete witte²⁷ melcke. Ende omtrent deser fonteinen, in den water, waren II zeeridderen spelende soetelic ende amoreuselic mit eenre meerminne oft zeejonffere; ende elck dye wilde, dranck uut deser fonteinen, dat al claer scoen wijn was. Vandane quam hi in die strate genoemt dye Brocamer, daer een fonteyn stont van XX toernen, daer oec allerley wijn uut liep van diversen coloren. Doen quam hij voer dye poorte des casteels, daer een figuer stont van eenre camelen, in allen schine oft hi gheleeft hadde. Daerop sat een swart Moriaen, die oec sceen te leven. Daerenboven was des princen palays boven ende beneden behangen ende gecyert mit costelicke tapeten ende andere lakenen. Boven allen desen waren daer noch vele costelicheden ende triumphen van batamenten ende andere singulare uutgesochte nyewicheden, die men niet wel en soude konnen uutspreken, ende hier gelaten worden om cortheit, etcetera, die alle tesamen gheschiet ende gedaen sijn ten coste der stede van Brugge. Item. Tot emende ende beteringe des princelike majesteyts ende voer sine injurie was geordineert, dat die van Brugge opter stede, daer si den prince die voetval deden, ende gracie vercregen, doen setten souden een groot stenen cruys, mit enen stenen tafele daeran, ende daer mit letteren in gegraveert ende gehouden die sake van der misdaet. Item. Die poorte die men hiet die Boverypoorte, daer die prince ingecomen was ende tot sinen wille niet weder uutcomen, soude ten ewigen dagen vast toegesloten bliven, ende men soude een ander poorte ordineren om uut te gaen; mer men soude daervan maken een capelle, ende daerin fonderen ende stichten een vicarie van LX ponden conincsmunte tsjaers, tot behoef eenre dagelixer missen die men alle dage dair doen soude bi een capellaen tusschen VIII ende IX uren des smargens, voir alle dergeenre sielen die daer verslagen waren. Ende die vicarius ofte cappellaen van deser vicaryen soude sijn woenstat ende residencie hebben in deser capellen, ende die grave van Vlaenderen ende sine nacomelingen souden wesen ende bliven tot ewigen dagen collatoren ende patroenen van deser vicarien. Ende in deser capellen soud men doen scilden ende scriven dye sake waerom dat dese poorte tot eenre capellen geordineert ware. Item. In recompensen des doots van den edelen baroen ende ridder den here van lIle Adam, souden die van Brugge sijn lichaem doen begraven²⁸ in Sinte Donaciaens kerke ende tot sijnre ewiger memorien²⁹ doen maken sine sepulture een groot stenen beelde mit sine wapenen. Ende voer sine siele, die siele des scoutes Mourijn van Wassenaer ende Jacobs, sijns broeders, ende alle dergeenre die die van Brugge hadden doen onthoefden ende rechten, laten doen jaerlics een ewige memorie mit een vigelie van IX lessen, als dat gewoenlic is, ende des anderen dages een singende misse van requiem, tot welker missen die burgemeesteren, scepenen ende rade van Brugge gehouden souden wesen te comen selver in personen ende noch XXIIII eerbare personen, elc mit een waskeersen in die hant van VI pont wasse; ende sullen die houden bernen also lange dat officie van der missen duert. Ende men soude elc van dyen geven van sinen zalarij IIII Vlaemsse Groten. Hierenboven souden noch die burgemeesteren, scepenen, dekenen ende raetsheren van der stede, als si des versocht worden, den prince, als hi in der stede quame oft sine gedeputeerde, een voetval doen, ende beloven ende sweren te onderhouden alle ponten ende articulen in den zoenen uutgesproken ende bescreven waren. Ende boven alle dese ponten souden die van Brugge den prince noch geven voer hoere misdaet ende scade die si gedaen hadden CC M Phillipse Scilden ende meer andere dingen die si doen souden, die om der cortheits willen hier gelaten worden.

27 wiite AB.

28 begra AB.

29 aldus A; ewige B.