Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat heer Franck van Borsselen gevangen worde, ende hoe om sijnre verlossinghe vrouwe Jacobe resigneerde ende overgaf hertoge Philips, horen neve, alle hair luden ende heerlicheden.
Dat XLIX capitel.

Des jaers dairna, als dese geloftenissen van desen heimelicke openbaer worde ende hem verspreide over heel Hollant, hertoge Philips, die op die tijt lach in Vrancrijc, becommert wesende mitten oerloghe, heeft dese mare ende tidinge mede vernomen. Ende heeft alle sijn dingen bi sine capiteinen geordineert ende gescict, ende is mit enen betameliken staet in den landen van Hollant gecomen, hem veynsende van genen dingen te weten. Nochtans was hy des seer toernich ende gestoert, beduchtende mits desen uuten heerlijcheden der landen van Henegouwen, Hollant, Zeelant ende Vrieslant verdreven te worden. Ende is gecomen in des tsGravenhaghe in den maent van julio. Ende nae vele handelinghen heeft dye hertoge doen vanghen in presencie ende tegenwoerdicheyt der hertoechinne desen heer Franck van Borsselen, ende dede hem te scepen brengen doir Delft ende Rotterdam, ende liet hem al vast ghevanghen legghen opt huys te Replemonde in Vlaenderen. Vrouwe Jacobe dit verhorende is den hertoge nagevolcht, opdat si horen man wedercrigen mochten. Dwelcke die hertoge niet doen en woude, ten waer sake dat si hem resigneerde ende overgave die heerlicheden voerseyt. Ten lesten by middele ende compositie des graven Vredericxs van Moers heeft si horen man weder uuter vangenissen gecregen op sulker condicien als dat si soude resigneren ende overgeven hertoge Philips, horen neve, vrij ende al die graefscappen van Henegouwen, Hollant, Zeelant ende Vrieslant; ende si soude desen heren Franc trouwen tot enen gheechten man. Mit sulker condicien waert sake dat si kinderen tesamen cregen, die souden alsdan succederen ende volgen in die heerlicheden voerseit. Ende des soude die hertoge heer Franck geven ende verlenen dye graefscap van Oestervant, ende der hertoechinne de heerlicheden ende landen van Voern mitter stede van Den Briele, ende dye heerlichede van Zuyt-Bevelant mittet lant van der Tholen. Ende voert alle dye tollen des lants van Hollant ende Zeelant. Ende mit deser compositie worde heer Franc van Borsselen ende van Zulen ende van Sinte Martijnsdijck, grave van Oestervant, ende troude openbaerlijck dese doerluchtige vrouwe Jacobe tot enen geechten wive in dye stede van Sinte Martijnsdijck; mer si en cregen gheen kinder te samen. Weinich tijts hiernae, in den maent van aprille, sijn hertoghe Phillips van Bourgongen ende vrouwe Jacobe sijn nichte tesamen ghereist in den landen van Henegouwen, Hollant, Zeelant ende Vrieslant, ende heeft hem vrij ende willichliken resigneert ende overgegeven ende doen hulden van allen heren, steden ende poerteren der voerseyder landen, als een warachtich heer ende erfgenaem. Dit gedaen sijnde heeft de hertoge den grave⁶⁰⁴ van Oestrevant ontfangen ende gegeven die oerden van den Gulden⁶⁰⁵ Vliese. Ende in den jaer daerna, als men screef M IIII C ende XXXVI, op Sinte Dionijs' avont, is dese doerluchtige princesse vrou Jacoba oflivich geworden opt slot te Teylinghen, als si die graefscappen van Henegouwen, Hollant, Zeelant ende Vrieslant berecht ende regiert hadde in groter tribulatien ende verdrieten XIX jaer lang. Ende wert mit groter eren ende triumphen in Den Haghe begraven opt hof in enen sconen tombe by hertoghe Aelbrecht, hoer oudevader.

604 gavr AB.

605 guden AB.