Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van dat IIII huwelyck vrouwe Jacobs voerseyt.
Dat XLVIII capitel.

Als nu IIII jaer ruste ende vrede hadde geweest tusschen vrouwe Jacobe ende hertoge Philips van Bourgondien, horen neve, op conditien dat si voertan ghenen man nemen noch trouwen en soude buten sinen consent ende wille; ende mits desen soude si wel gestelt worden in haer heerlicheden ende vaderlicke erve, mer des soude die hertoge bliven ende wesen haer leven lang momber, voecht ende ruwaert der landen voerseyt, soe ist ghevallen int eynde des jaers, als men screef dusent CCCC XXXII, dat vrouwe Margriet, haer moeder, heeft hoer ghesonnen by enige edelen ende notabele personen sekere cleynoden ende scone paerden tot eenre ghiften ende presente, doende haer minlike mitsdien groeten. Mer vrou Jacobe, die nu niet en hadde enige ghelden giften oft gaven waermede si haer ere hadde mogen bewaren om desen ridderen⁶⁰² ende edelen mannen te scencken, omdat si overmits den langen oerlogen alles hoers goets, gelts ende scats quijt was geworden, heeft si secretelic gesonden totten burchgrave Johan van Montfoert, dye dair te voren stathouder des lants van Hollant uut horen naem hadde geweest, ende als men seyde groot scat ende goet by hem had, dat hy hoer wilde lenen een sekere taxs van peningen, opdat si nyet bescaemt en bleve voer haer moeders ambassaten, heren ende ridderen, want si niet en hadde henluden te scenken. Dye burchgrave dede grotelic sijn onscult, seggende dat hy sijn goet, scat ende ghelt in horen diensten wesende uutghegeven ende quijt geworden was. Als sij dit hoerde, was sy seer droevich ende qualycken te vreden. Ende sant hoer boden tot een anderen, dair si geweygert worde als van den eersten. Doen wert si bitterlic screyende, ende ging in haer camer beclagende die ongetrouwicheit haerre vrienden ende haer confuselike scande. Dit anmerkende een van hoer dienres, gheheten Willem Bie, ende medeliden mit hoer hebbende, sprac haer: 'Gelieftet mijn vrou, dat ic gae tot heer Franc van Borssellen⁶⁰³, stathouder van Hollant, ende dat ic hem te kennen geve mijnre vrouwe gebrec, ic hoep dat ic goeden antwoert sal vercrigen van tgeen dat ic begeren sal.' Doen sprac si mit droeviger stemme: 'Hi is van onsen wederpartie, ende wi en hebben hem noch de sine nie goet gedaen. Aldus sorch ic dat hi ons geen bystant en sal willen doen, ende dan te meerre scanden hebben.' Doen seide Willem: 'Nochtans ic salt besoken doir menigerley middele indient mijn vrou belieft.' 'Ic sorch,' sprac si 'dat ghi niet verwerven en sult. Niettemin, gaet, ende geeft hem die sake te kennen. Ic sal wederom dancber wesen alst tijt ende stonde geven sal, ende ic sal hem doechdelyck ende eerlic wederom voldoen.' Ende als Willem zijn boetscap proper ende manierlic hadde gedaen an denselven heren Franck, sprack hy: 'Segt mijnre vrouwen dat ick nu nyet alleen tot desen stonden mer tot allen tiden alst hoir

602 rtdderen AB.

603 Bossellen AB.

[p. 276v]

belieft, is alle mijn goet tot horen goden, bereyde ende beliefte, ende tot haere belyeften mach si dat gebruken.' Vrou Jacobe dit horende was des seer verblijt, ende dancte God ende den goeden Here. Ende van dien tide voert had si desen heren Franck in groter waerden, ende beminden seer, omdat si hem in haren noet hem een getrou vrient bevonden hadde. Ende opt cortste geseit: hi sprac alsoe mit hoer, dat sij malkanderen trouden secretelic ende heimelic in haer camer, dat niet veel luden en wisten.