Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van heer Walraven van Moers, postulaet van Uutrecht.
Dat XLVI capitel.

Als biscop Sweer voer den paeus Eugenius uut sijn bisdom gewonnen was, overmits grote beclachten ende overtredinge des Stichts privilegien, die hy hem besegelt ende gesworen hadde, soe en hielt biscop Sweer van den paeus Eugenius nyet, ende behalp hem mittet Consilium⁵⁹³ dat te Basel was, ende appelleerde daer van sine destitutie ende ofsettinge; mer niet lange, hi en starf dair van den buyckevel, ende wort aldaer begraven.

Int jaer M CCCC ende XXXII, als hi dat bisdom hadde berecht XI jaer ende niet meer dan X maenden als een geweldych heer, doen vergaderden here Peter Passert ende mit hem noch XII canonicken, die tot nochtoe uuter stat ghebannen ende verdreven waren gheweest, ende coren in dye stede van here Sweer enen edelen man, joncheer Walraven van Mors, tot enen biscop van Uutrecht.

593 consiilum AB.

[p. 275v]

Ende die paeus Felix dye Vijfte, die int Concilie van Basel paeus ghecoren was tegen den paeus Eugenius⁵⁹⁴, gaf desen here Walraven dye confirmatie van den⁵⁹⁵ bisdome. Dese heer Walraven hadde twe broeders, als heer Dirck van Moers, biscop van Coelen, ende Frederijc, grave van Moers. Ende als hi mitten biscoplicken digniteyt was versien, quam hi in Hollant, ende sette sinen bisscops stoel in der stede van Dordrecht. Ende die landen van Hollant, Zeelant, Vrieslant ende Ghelrelant, die hilden haren geestelicke jurisdictie ende rechten van hem, ende obedieerden hem, wair van dat grote twedracht onder de ecclesie ende geestelicheit opgeresen is. Mer nochtans en mocht hy nyet comen in dye possessie ende bisittinge van enigen steden of sloten, want biscop Roelof dede die naerstelyck ende wel bewaren. Ende doer desen heer Walraven, so absenteerden ende ofkeerden hem die Hollanders, Zeelanders ende Gelres van der obediencie ende gehoersamheit van biscop Roelof, totdat men screef M CCCC ende XLI.

594 Engenius AB.

595 van dan AB.