Hoe heer Sweer van Culenburch, biscop van Uutrecht, ofgeset wort, ende heer Roelof van Diephout weder dairin geconfirmeert wort.
Dat XLV capitel.
Omtrent Sinte Lambrecht, int jaer M CCCC ende XXX, als daer grote inquisitie ende ondersoec was gedaen doer beveel des paeus Eugenius die IIII van den querelen des Stichts tegen haren biscop heer Sweer, bi den notabele geestelicken heer Jan, biscop van Vatisconen, soe heeft dieselve Eugenius voerseit uut paeuslicke macht ende auctoriteyt absolveert, destitueert ende ofgeset den voerseyde heer Sweer van sinen bisdom, ende gaf hem enen biscopliken tijtel, als biscop van Cesarien; ende dieselve paeus voersachGa naar voetnoot592 ende gaf dat bisdom heer Roelof van Diephout, den postulaet, ende gaf hem dairof dye confirmatie. Ende die vercregen hebbende, worde hy mit groter solemniteiten ende feesten opt slot tot Vollenhoef gewijt dye LIII biscop van Uutrecht, als van den biscop van Osenbrugge, van Minden, ende noch twe suffraganen. Dese heere Roelof, des graven soen van Diephout, hoewel hi volna een waerlyck ende ongheleert man was, nochtans was hy een liefhebber, bescermer ende fautoer van allen gheestelicken personen. Daerenboven soe dede hy seer verbeteren ende vernyewen dat biscoplycke hof ende palays binnen Uutrecht, ende andere sloten ende castelen des Stichts, die vervallen ende vergaen waren, dede hi repareren ende vermaken. Die kercken verchierde hij mit costelicke glasen, ende was in sijnre tijt een glorioes ende oetmoedich prelaet, ende een vreedsaem man mit allen princen ende sijn naegebueren, ende worde een rijck ende ontsiende heer, reformerende alle saken tot enen doechdelicken ende loeflicken staet ende einde.
Auteursrechtelijk beschermd