Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe hertoge Philips van Brabant oflivich worde, ende hoe hertoge Philips van Bourgongen hertoge van Brabant worde.
Dat XLIIII capitel.

Opten IIII dach van oestmaent int jaer M IIII C XXX, doen starf te Loeven opten Burch hertoge Philips van Brabant, Lotteringen ende Limburch, ende grave van Simpol, als hi die landen hadde geregeert III jaer lang. Ende als hi ghestorven was, quamen dye III staten van den landen van Brabant, ende overdroegen dat men den doden lichaem onbegraven laten soude totdattet landt had een nyewen heer, het en waer dat de princen ende heren van zijn naesten⁵⁸⁸ bloede dairop anders ordineerden, also hi sonder wijf ende kinderen gestorven ware. Op dese tijt had hertoge Philips van Bourgongen mitten Engelschen belegen

588 naetsten AB.

[p. 274v]

die stat van Compiengen in Vrancrijck; ende vernemende den doot van sinen neve, so quam hi neder. Ende corts hyerna, alst dode lichaem van hertoghe Philips voerseyt noch onbegraven stont tot Loeven op die Burch, so waren daer notabelic vergadert dye III staten van den lande ende der landen van Over-Mase. Ende daer quam bi henluden vrou Margriete van Boergongen, dochter wilen hertoge Philips van Bourgongen Lehardy, ende wedue wilen hertoge Willems van Beyeren, grave van Henegouwen, van Hollant, etcetera, suster hertoge Jans van Bourgongen ende hertoge Anthonis van Brabant, vader van hertoge Philips van Brabant, nu gestorven, ende si gaf te kennen dat dat hertoechdom van Lotteringen, Brabant ende Limburch van rechts wegen op haer ware bestorven, want si wair dye naeste erfgenaem in levende live; want si waer hertoge Anthonis' suster, ende desen hertoge Philips moye, niettegenstaende dat si een vroupersoen waer, want dat hertoechdom tot anderen tijden op vroupersonen bestorven ware. Aldus badt si den staten van den landen dat si haer nemen ende ontfangen wouden voer een hertoechinne van Lotteringen, Brabant ende Limburch: sy woude hem wesen een goede genadige vrou. Op dander sijde quamen notabelic van hertoge Philips wegen van Bourgongen die biscoppen van Doornic, Amiens ende Atrecht, mit vele andere grote heren, geestelic ende waerlyc, seggende dat dye landen van Brabant, van Lotteringen ende van Limburch gecomen waren van rechts weghen op hertoge Philips van Bourgongen, haren heer; want van vrou Johanne, die hertoechinne ende erfvrouwe was van Brabant, so waren de landen bi haere doot verstorven op hertoge Jan van Bourgongen, vrou Margrieten soen van Vlaenderen, vrou Johannen suster voerseyt, desen hertoge Philips vader. Mer hertoge Jan van Bourgongen, bi consent ende believen des conincs van Vrancrijcs ende hertoge Philips Lehardy sijns vaders ende vrouwe Johanne, sijnre moyen, hadde dye voerseyde landen resigneert ende overgegeven Anthonis, sinen broeder, met voerwaerden ende conditien, dat oft hi ende sine erven tot eniger tijt oflivich worde sonder wittachtige manlicke geboerte after te laten, dat alsdan die voerseyde landen wedercomen ende erven souden op dat naeste bloet ende oere hertoge Jans van Bourgongen, ofte op sine erven, van welke ordinancie ende resignacie gemaect worden goede besegelde briven, by consent des conincs, des hertogen Jans ende vrou Johanne; dairof si thoonden vidimus autentic uuten princepael briven. Ende want hertoge Anthonis ende beide sijn zonen oflivich geworden waren sonder enige wittachige geboerte after te laten, soe allegeerden ende seyden si dat hertoge Philips, haer heer, die naeste was, ende baden den staten dat si hem nemen wouden tot enen hertoge van Brabant: hi woude henluden wesen een goede genadige heer. Op welke articulen dye ambassaten van vrou Margriete repliceerden, seggende dat alle die voerseide voerwaerden wilen eer gemaect tusschen hertoge Jan ende hertoge Anthonis, haren broeders, haer niet hinderen noch letten en mochten, want die makinge ende ordinancie niet geconfirmeert noch toegelaten was van den keyser, als van enen overheer, daer men de landen of te lene hilt. Daer die ambassiaten van den hertoge weder op antwoerden⁵⁸⁹ ende seyden, oft men seggen woude, dat die voerseide voerwaerden ende sceydinge van geenre waerden en waren, so moste dan dairuut volgen dat hertoge Anthonis ende beide sine zonen dat lant mit onrecht beseten hadden, ende dattet bi der doot van vrou Johanne verstorven waer op hertoge Jan van Bourgongen, als op doutste zoen, ende daerna op hertoge Philips, sinen zoen, nu belevende, weder nu die voerseyde voerwaerden ende makinge cracht hadden oft nyet. Soe seyden si, ende concludeerden mit redenen, dat die landen op haren heer bestorven waren. Dese ende meer andere redenen van beyden sijden doe angehoort ende wel gewegen, soe hebben dye III staten der voerseyder landen eendrachteliken overdragen ende gesloten dat si den voerseyden hertoge Philips van Bourgongen voer haren prince sculdich waren te ontfanghen; dwelcke verstaende vrou Margriete reysde si wederom tot Kenout in Henegouwen. Enige willen seggen dat grave Kaerle van

589 anwoerden AB.

[p. 275r]

Nyvers, grave Philips' soen, hem recht vermat in Brabant te hebben; want men seyde, dat hertoge Philips Lehardy, bij consent van vrou Johanne, geordineert ende ghemaect hadde, waert sake dat hertoge Anthonis oft sine kinderen oflivich worden sonder wittachtige manlike geboerte after te laten, dat alsdan tlant van Brabant comen ende erven soude op grave Philips van Nyevers, hertoge Jans ende hertoge Anthonis broeder, of op sine kinderen. Ende dit dairom: want hy minst van sinen vader, hertoge Philips Lehardy, gegoet was. Mer gheen claer besceyt en hebbe ic hierof bevonden. Aldus so tracteerden de III staten van den landen wijsliken mitten ambassiatoers van den hertoge van Bourgongen van den rechten vriheden, privilegien ende hantvesten, dye die hertoge vestigen ende verlenen soude, ende in sijnre incoomste confirmeren; dwelke si den voerseyden hertoge, te Mechelen doen sijnde, intimeerden; ende als men mit hem daerof overcomen was na uutwisinge der brieven daerop gemaect ende gegeven, so overdroech men den dach dat dye hertoge sijn incomst tot Loeven doen soude. Dwelcke gesciede int jaer M CCCC XXX des donredages opten vijften dach van october. Ende des saterdages dairna wert dat dode lichaem wylen hertoghe Phillips, sinen neve, te Vueren ghevuert, dair hy dat eerlic begraven dede by hertoge Anthonis, sinen vader, ende by sijnre moeder, ende hertoghe Jan sinen broeder⁵⁹⁰. Ende dat graefscap van Simpol dat bestarf⁵⁹¹ op Lodewijc van Lutsenburch, heren Peters soen van Lutsenburch, grave van Conversant ende heer van Adingen in Henegouwen.

590 kroeder AB.

591 bestraf AB.