Hoe hertoghe Philips coftet graefscap van Namen.
Dat XLIII capitel.
Int jaer Ons Heren M CCCC XXIX, cofte hertoge Phillips van Bourgongen van grave Dirck van Namen dat graefscap van Namen, by hulpe ende toedoen der stede van Ghent, voer een sekere somme van penninghen, die si dairvoer betaelden ende verleyden. Ende grave Dirck dede den hertoge hulden in allen steden ende plecken van den graefscappe binnen sinen leven. Ende niet lange dairna, grave Dirck starf, sonder enige kinderen after te laten. Als hi nu grave van Namen gheworden was, sette hi dair een stedehouder ende castelein opt slot te Namen: den edelen baroen heer Jan van Croy ridder, dye dat uutGa naar voetnoot587 sinen name soude regieren. Ende als die van Ludic dat verhoerden, gaven si den hertoge te kennen hoe datter waren zommige dorpen den Sticht van Ludic toebehorende, die de graven van Namen lange tiden hadden beseten, begerende dye weder te hebben. Dwelcke hertoge Philips in geenre manieren doen en woude, omdat hi dit graefscap van den grave Dirc voirseyt vri hadde ghecoft, also hi dat beseten hadde; waerom datter een groot oerloge tusschen dat Sticht ende den hertoge opgeresen is. Ende de tijt dat hertoge Philips mitten Engelscen in Vrancrijc groot oerloge hadde tegen die Fransoysen, soe quamen de van Ludic mit gewapender hant int graefscap van Namen, ende deden dairin grote scade, mit roven ende branden. Die hertoge dit vernemende sende den here van Croy mit groter macht van volc int lant van Ludic, ende dede dair weder groten scade mit roven ende branden ende nam vele gevangen mit hem. Die hertoge Philips van Brabant heeft ten lesten een bijstant gemaect, ende binnen den tijden worde dair een vasten pays ende vrede gemaect tusschen hen beiden.
Auteursrechtelijk beschermd