Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe hertoge Philips van Bourgongen ende vrouwe Jacobe worden verenicht, ende van enen wonderlicken aertbevinghe.
Dat XL capitel.

Opten IIII dach van meye int jaer M CCCC XXVIII, soe sijn bi middele ende tusschenspreken van enige wise ende notabele personen byeenvergadert⁵⁸² ende verenicht geworden hertoge Philips van Bourgongen ende vrouwe Jacobe, hertoechinne van Beyeren. Ende daer wort also gedadingt⁵⁸³ ende uutgesproken, als dat die hertoechinne dede haren neve hertoge Philips hulden in den landen van Henegouwen, Hollant, Zeelant ende Vryeslant voer enen rechten ruwaert, oer der landen voerseyt. Ende die hertoge setten doen een stedehouder ende regent der landen van Hollant, Zeelant ende Vrieslant, heer Vranc van Borsselen, ridder, heer Floris soen van Borsselen. Dese here Vranc was heer van Borsselen, Zulen ende van Sinte Martijnsdijc. In datselve jaer gaf die hertoge van Bourgongen enen swaren sentencie tegen die stede van Alcmaer ende den Kermers, om haer rebelheit ende vermetelheit, die si gedaen hadden mitten joncheer van Bredenroede, als voerghescreven is. In dit voerseyde jaer, des vridages voer Vastelavent, so was een alten grote aertbevinge int lant van Cathelonien, de lange tijt duerde; welke wel XX steden ende enen sconen abdye destrueerde ende terneder warp. Ende dese aertbevinge ging voert tot Aquitanien ende Gasscongen, ende voert in Vrancrijc⁵⁸⁴, ende doe te Monpelier. Ende aldaer versanc een stat van den aertbevinge, geheten Territorie; ende op die stede dair de stat plach te staen, bleef een poel oft water, dat men den gront daer niet van vinden en konde, so diep was sij. Int selve lant van Monpelier quam een beer uuten woude, denwelcken volchde een grote menichte van serpenten ende slangen. Dese quamen in steden ende dorpen⁵⁸⁵, ende

582 byeenvargadert AB.

583 ghedaingt AB.

584 Vranrijc AB.

585 dorppen AB.

[p. 273v]

doden mit haer venijn ontallicke menscen. Item, die grote stat van Berzelonen in Cathelongen bleef ijdel ende leech staen, sonder enich volc. Want de stede was also gedestrueert van der aertbevinge, datter gheen menschen in en dorsten bliven. Mer si liepen als rasende ende verbaesde luden, nyet wetende waer si hem bergen souden. Ende die dit gesien ende vertelt heeft, was een prior van der Cathuser Oerden, van den Convente des Dals Jhesu, ende heeft dit in scrifte gelaten ende aldus vertelt openbaerlic int generael capitel in Savoyen, in presentie van vele eerwaerdige vaderen ende prioren des voerseyden Oerdens, die dat voert in allen hoeken ende landen des werlts kondichden ende verbreyden, om den sondighen menschen te trecken tot penitentien ende beteringe des levens.