Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van enen strijt dye by Wieringen gesciede.
Dat XXXIX capitel.

Als nu hertoge Jan van⁵⁸⁰ Brabant oflivich⁵⁸¹ geworden was, int selfde jaer, so vergaerden diegeen diet mit vrou Jacobe hilden een groot heer van volc, ende meenden altemet Hollant in te winnen ende dat brengen onder die dominij ende heerscappie van vrouwe Jacobe. Ende van desen vergaderinghe was cappetein ende hooftman jonckheer Willem van Bredenroede, oem van joncheer Reinout van Bredenroede. Dit wouden si bestaen te doen int uuterste van den lande, ende dan so voirt gaen al Hollant doir.

580 aldus C; ontbr. AB.

581 oflvich AB.

[p. 273r]

Aldus hebben si scepen doen bereiden om te zeylen in Wieringen ende Tessel. Ende als dit vernamen de steden van Haerlem, Aemstelredam, Hoern, Enchusen ende andere steden, hebben sij vele scepen ende gewapent volck vergadert, ende togen haesteliken haer vianden tegen in dye zee. Joncheer Willem siende dye scepen sijnre vianden van verre, is hy mit sijn volck opt lant getreden int eylant van Wieringen, ende brocht dat een weynich tijts ghedurende onder die macht van der hertoechinne. Ende als hi dair bleef legende vertovende, so sijn si an dat eylant gecomen gezeylt, om hem dairin te besluten oft hem tot een stryde te verwecken. Ende die joncheer geboet dat si hem alle souden bereyden om tscepe te strijden. Ende hair spijse bereyt wesende, gingen si tscepe. In dye ure wast een ebbe, ende dat water was seer ghevallen, also dat die grote scepen der voirseyder steden en mochten niet vloten. Aldus soe hadde dye joncheer den meesten hoop van scepen dair men uut vechten mochte; mer nochtans en quamen si niet al te gader bieen ten stride, mer bleven leggen van verres, om te sien die voer scepen hoe si hem souden hebben in den stride, opdat si daeruut cloeker ende koenre souden worden te striden oft te bet uutten stride te comen ende te vlien. Soe sijn dan dese scepen aneen geroeyt, ende dair began eenen bitteren strijt, ende dair wort vreseliken ghevochten; mer meest bleven si doot oft verdrenct van des joncheren wegen. Dwelke siende die in die scepen van der after hoede waren, worden vervaert ende begonnen te vlien; mer si en mochten so nyet wech comen, want die ander waren hen te cloeck mit roeyen int vervolchgen, ende slogen vreselicken op hen, datter vele geslagen worden ende vele buten boerde gheworpen die verdrencten. Ende dair worter vele gevanghen. Ende jonckheer Willem worde dair mede ghevangen mit meer andere, dien si brochten tot Enchusen, dair alle dander scepen doen mede quamen van dye steden. Ende dye steden daer vergaedert wesende, hilden si raet, wat men mitten gevangenen soude doen; ende concludeerden, als dat si LXXX van den gevangenen dede onthofende. Ende joncheer Willem van Bredenroeden, overmits sine edele geboerte, worde hy vrij laten gaen, hoewel dat sommighe gaerne gesien hadden dat men hem mede onthoeft hadde. Ende van die tijt voert en hoerde men in langen dagen ende jaren van genen rumoeren, oplopen van striden binnen tslants.