Hoe dat hertoge Jan van Brabant oflyvich worde, vrouwe Jacobs man.
Dat XXXVIII capitel.
Int jaer Ons Heren M CCCC ende XXVII, opten Witten Donredach, worde oflyvich hertoghe Jan van Lotteringen, van Brabant ende van Limburch, vrou Jacobs geechte man, als hi Brabant ende sine andere landen hadde regeert XII jaer lang. Sijn lichaem wert mit groter eren begraven tot Vueren, by sinen vader hertoge Anthonis. Ende als hy sonder kinderen was gestorven, soe volgde hem int hertoechdom grave Philips van Simpol, sinen broeder. Int selve jaer worde binnen der stede van Delft doot geslagen, opten eersten donredach in der Vasten was, Jan van Egmont, heer van Soetermeer, scout van Delft, mit noch vijf andere; ende dit deden enighe lantluden uut Maeslandt. Ende des saterdages dairnae worden XII mannen van desen dootslagers onthooft, ende haer hoefden worden opter poorten geset.
Auteursrechtelijk beschermd