Van den stride die voer de stede van Hoern gesciede.
Dat XXXVII capitel.
Dit voerseyt aldus gescyet wesende, namen die Kermers van der hertoechinne wegen tot enen cappetein ende hoeftman Willem Nagel, ende togen uut ende destrueerden dat slot tot Heemskerck, omdat die van Haerlem dair tevoren verwoest ende vernijelt hadden die sloten tot Bredenroede, Heemstede ende Ascendelf. Op dese selve tijt van oerloge worden oeck ter neder geworpen dat huys te Hillegeersberghe, Cralingen ende Spangen in Scijelant. Dairna quamen die Kermers in Waterlant ende wonnen die steden van Waterlant als Monickedam, Purmereynde ende Edam. Ende togen voert, ende wonnen Medemblic ende Enchusen, ende vandane reysden si nae Hoern. Dit vernemende die poorters van Hoern quamen hem tegen ten stride. Ende die scout van Hoern wort daer dootgheslagen mit vele goede rijcke mannen. Dit siende die ander, liepen haestelicken wederom in dye stede. Ende daer worter vele gevangen, onder diewelcke dat IIII van den besten ende eerbersten van der stede waren. Willem Nagel quam an dye stede mittet heer, mit hem brengende dye IIII gevanghen. Doen riep hy totten poorteren van binnen: 'Tensi dat ghy my dye poorten open doet, oft anders ick sal dese IIII poorters voer u stede doen onthoefden.' Ende dit sprac hy, hopende dye poorten op te crigen eer si haer poorters souden laten rechten, waervan dat een groet rumoer in der stat is geweest. Ende nochtans en woude si dye poorten nyet op doen, verbeyende assistencie ende hulp als hem hertoge Philips hadde belooft. Soe heeft dan die hertoge gesonnen den heere van lIlle Adam, mit een groot heer, als sinen oversten ritmeester ende cappetein, binnen die stede van Hoern. Ende als hi in die stede was gecomen, liet hy dye poorte an der noortside van der stede opdoen. Ende is mit sine soudenyers ende knechten tegen Willem Nagel ende sijn heer uutgegaen, om enen strijt te vechten. Ende daer geviel enen groten strijt; want die van Amsterdam, die mede in dye stede waren, togen uut mit die poorters van Hoern tegen dese Kermers mit groter vromicheit. Ende daer bleef doot Willem Nagel mit veel van den Kermere. Ende veel die clouck waren, die ontquamen; ende si vervolgden se tottet dorp Wognom, ende daer worter vele geslagen. In denselven strijt ontfing dye heere van lIlle Adam twe quetsuren ende wonden, daer hi langhe tijt an lach te meesteren binnen Hoern. Daerna, als hy wat began te beteren, quam dye hertoge tot Hoern, dair hy eerlicken worde ontfangen; ende ten lesten ontfingen hem mede die stede van Waterlant ende Weest-Vrieslant.
Auteursrechtelijk beschermd