Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van die anderde strijt, die in Alphen geviel.
Dat XXXVI⁵⁷⁸ capitel.

Als hertoghe Philips van Bourgongen vernam dat die stede van Haerlem dus starckelic was beleghen ende dagelixs angevochten worde, heeft hi een groot heer van volc vergaedert uut Vlaenderen, uut Piccardyen, genoemt die Kammers, daer hy cappetein of maecte den heer van Uutkercken ende den heere van Lychtenvelde, myt meer andere heren ende ridderen, diewelcke hi sende in Hollant. Ende comende tot Leyden, bereyden si hem des anderen daghes vrouwe Jacobs heer te bevechten. Ende si hadden enen man toe gemaect in malaetsen habyte, denwelcken sij enen brief medeghegeven hadden, ghebacken in een schoon wit broot, om dye te brenghen binnen Haerlem. Ende als hy gecomen was tot Heemsteden int heer, biddende sijn broot om Goods willen, wort hy angegrepen ende examineert; ende den brief⁵⁷⁹ int broot ghebacken vonden si mede, ende lude aldus: 'Ghy vrome vrienden ende poorters van Hairlem, weet dat wij tot Leyden ghecomen sijn; ende op morgen willen wij mit al onsen machte trecken tot Alphen ende stoppen die Goutssluse, opdat die hertoechinne mit haer here genen wech noch doergang en hebben weder te keren binnen der Goude. Ende dat ghedaen sijnde, willen wy u te hulpe comen.' Als die hertoechinne desen brief hadde horen lesen, dede si den brenger an enen boem hangen. Ende als dye sonne tonder was ghegaen, bracken sij op van haren belegge voir Haerlem, ende gheboet dat heer te scepe te gaen, ende roeyden alle den nachte, ende quamen des morgens vroe in der dageraet, ende begrepen dat dorp te Alphen. Ende als sij dat heer saghen ancomen, so ordineerden sij haer battaelge, ende setteden hem in ordinancie opten dijck. Ende vrouwe Jacobe was selver in persone in den strijt. Die heer van Uutkerken, dye dit scielicken heeft vernomen, heeft vermaent sijn volck dat si hem vromelyc weerden. Ende dat geviel enen langen bitteren strijt. Ten lesten als die heer van Uutkercken sach dat sijn volck mit groten hopen geslagen worde, vloech hy uuten strijde; ende dair bleven van des hertogen wegen geslagen wel V hondert man, mit alle die Kammers ende LXXX poorters uuter stede van Leyden, mit Otte van Reimerswael, baelju van Rijnlant. Ende dat heer worde vervolcht tot an die poorten van der stede van Leyden. Mer weinich blevender van der hertoechinne wegen. In desen stride worden ridder gheslegen Jan van Wassenner, heer van Voerburch, burchgrave Philips jongste soen van Leyden; heer Henrick van Cronenburch; heer Evert van Hoechtwoude, hertoge Willems bastertsoen van Beyeren; heer Jan van Langeraeck, heer van Asperen; heer Dirck van der Merwen; heere Gerrit van Poelgeest, heer van Hoemade, ende heer Aernt van Ghent uut Gelrelant. Dese bloedige strijt ghesciede op die meyavondt in der dagheraet, int jaer Ons Heren M CCCC ende XXVI.

578 XXVI AB.

579 bref AB.