Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe die stede van Haerlem belegen worde.
Dat XXXV capitel.

Opten IIII dach van aprille, int selve jaer van XXVI, vergaderde vrouwe Jacobe een groot heer van volc uutter stat van Uutrecht, van der Goude, Scoenhoven, ende Oudewater. Ende is mit scepen ghevaren tot Heemstede bi Haerlem. Ende vandaen, opten selven daghe, quam al dat heer voer Haerlem, ende beleyden dye stede. Ende dair quam mede jonck-

[p. 272r]

heer Willem van Bredenroeden mitten Kermers ende mit die van Alcmeer, ende beleyden oec die stede mit vrou Jacobe. Die van Haerlem, dye dit over lange tijt wel voren wisten, hadden bi hem doen comen joncheer Jacob van Gaesbeec, stedehouder, ende heer Rolant van Uutkercken, mit vele vrome wapentuers, om de stede te bewaren. Die van Haerlem hadden op doen houden alle dat bosscagie ende dye boemgherden die omtrent haer stede stonden, opdat si dairuut gheen scade en soude liden van die van buten. Die stede bleef gesloten, ende die poerters mitten anderen vreemden soudenyers bereyden hem om dye van buten vromelycken te wederstaen. Dye van buten verbranden alle de husen ende die molens die buten der stede stonden, ende de Kermers branden al de voirstede buten de Cruyspoerte ende Sint Janspoerte. Dairenboven so en ruste dat heer niet te scieten, nacht ende dach, mit bussen ende vierpylen in die stede om dye te winnen. Mer die poorters ende andere weerden hem vromelyck, ende keerden haer vianden van den muren ende toornen mit bussen ende boghen, mit menigerley instrumenten. Andere stonden stadelyck op die muren bereyt mit water, om den brant te lesschen dye daer gheviel vant inschieten van den vierigen pijlen.