Van den oerloge datter opstont tusschen den hertoge van Bourgongen ende tSticht van Uutrecht, ende hoe Amersfoert belegen worde.
Dat XLI capitel.
Omtrent dese tijt is dair een groot oerloghe opgestaen tusschen hertoge Philips van Bourgongen, ruwaert van Hollant ende Zeelant ende dat Sticht van Uutrecht, ende dat, omdat die van Uutrecht tegen tgebot ons Heylige Vaders den paeus van Romen heer Sweer van Culenburch, byscop van Uutrecht, uut sinen eygen stat van Uutrecht verdreven hilden, ende bijsonder, want si fautoers ende hulpers hadden geweest der hertoechinne vrou Jacoba, in striden ende oerlogen voerleden; datwelcke oerloge seer lange stont, ende deden malkanderen menige scade mit roven ende branden, ende hadden vele scermutsingen tegen een, daer vele volcs om geslegen, ghevangen ende verbrant worden. Die hertoghe is selver in persone gecomen, mit hem brengende den heer van Lileadam, onse cappeteyn ende ridtmeester, mit vele Piccaerden ende andere natien van volc, uut alle sine landen, een grote minichte, ende is gecomen int dorp van Emenesse. Vandaen is hi gereyst voer die stede van Amersfoert, ende heeft die belegen mit groter mogentheit. Die Hollanders quamen mit hair scepen tot Spakenburch, ende dair gingen si opt lant, ende cregen dat steetgen van Bunscoten, ende toghen doe voert mit alle haer vitaelge ende ghereetscap van oerloge, ende haestede hem om den hertoge te hulpe te comen. So heeft die hertoge de stede willen bestormen, ende quam mit sine Piccarden ende soudenyers over die graften, ende clommen mit ladderen tot an die muren, ende begonnen seer fellicken dye stede te bestormen, an allen sijden, mit menigerley instrumenten van oerlogen. Die burgers van binnen weerden hem vromeliken, ende waren seer naerstich om die vianden van de muren te keren ende te wederstaen. Ende also in der stede vele brouwerien sijn, hadden die vrou van der stede vele heet ghesoeden water mit mout ghemenget te samen gecoeckt, ende brochten dat die mannen, staende op die muren, datwelcke si so heet goten op diegene die de stat bestormden, ende verbranden se mit allen seer, ende liepen mit groten ghecrij ende misbaer afterwerts van der muren. Dit gesciet wesende, brack die hertoge sijn belegghe op, ende dye stede bleef ongewonnen. Ende dye hertoghe destrueerde heere Herperts huys van den Busche, ende voerde hem gevangen mit hem. Dairna toech die hertoge int dorp van Emenesse mit alle sijn heer; ende hi dede maken een alten groten scip, oft een blochuys hadde geweest, dat men Die Katte hiet; ende dat scip worde gebrocht van Aemsterdam, daert gemaect was, ende dede dat leggen int gat van der ryeviere van der Eme, die van Amersfoert loept tot in die Zuyderzee. Ende mit desen instrument van der Catte, dwanck ende benaude die hertoge seer dat Sticht van Uutrecht, want hij daermede benam dat incomen ende uutreysen van der zee. Daernae quamen dye van Uutrecht mit groter menichte, ende sloegen een alten groten blochuys opten cant van der riviere der Eme, uuten welken si al te vreseliken scoten, mit bussen ende andere instrumenten, opt aensicht van der Catten, dat is opt voereinde van tscip ende bolwerc, ende destrueerden dat mit allen seer. Ende op dese tijt wast enen couden herden winter, sodat die Suderzee al bevroren was. Ende als dat weer bestont te doyen ende dat ijs wort ryende, soe worde die Catte mit crachte van den ijse geweldelic omgekeert, ende dat achterste keerde hem na dat blochuys toe. Ende
Auteursrechtelijk beschermd