Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat heer Sweer van Culenburch geordineert worde die LII biscop van Uutrecht, ende hoe hi weder verdreven worde.
Dat XXIIII capitel.
Biscop Sweer van Culenburch.

Die paeus aenmerkende dat die electie van een biscop te kyesen doir contumatie der ecclesie devolueert ende aen hem ghecomen was, ende verstaende⁵⁵⁸, dat dye kercke van Uutrecht een edele ende een rellygiose kercke was ende dat vele religiose ende gheleerde mannen hier voertijts dair hadden gheseten ende regyert, heeft hy dat bisdom ghegheven enen relligiosen gheleerden ende edelen man den biscop van Spiers. Mer dye biscop van Spiers vernemende dat heere Roelof, die postulaet, alle die renten, steden ende sloten des lants van Overijsel onder sine macht ende jurisdictie hadde, en woude hy sijn bisdom van Spiers nyet resigneren noch overgheven, ende comen tUtrecht op avontuer. Ende hi ontboet heer Sweer

558 aldus C; verstaen dye AB.

[p. 267v]

van Culenburch, den doemproest van Uutrecht, ende dede een permutatie van die domprostie ende andere beneficien, om die provisie van den bisdom van Uutrecht, ende hi promoveerde hem an den paeus, dat hi vercreech brieven van der provisie van tbisdom. Tegen welke provisie die postulaet, heer Roelof, van stonden an dede appelleren totten Stoel van Romen. Heere Sweer vercreghen hebbende⁵⁵⁹ de provisie, was naerstich mitten gelde te crighen van den paeus die confirmatie van den briven van der provisien, die hi verwerf. Ende nedercomende, dede hi die lesen tot Uutrecht. Dye steden van Overijsel mitten ridderscap ende edelen waren gesloten te bliven ende te adhereeren die appellatie van haren gecoren postulaet, ende wouden hem hulpe ende bistant doen totten eynde van trecht teghen heer Sweer voerseyt, uutgheseit Wouter van Coeverden, ter tijt toe die postulaet mitten uutersten recht daeruut gewonnen worde. Daerna weinich dagen, creech heer Sweer in sijn hulpe ende bystant sijnre vrienden ende magen dat slot te Horst; ende corts daerna worde hy tot Renen ende Amersfoert ingelaten. Dit ghesciet wesende, is hi des dijnsdages in der octaven van Onser Liever Vrouwen Hemelvaertsdach int jaer M IIII C XXV, mit een scoen geselscap van ridderen ende edelen, gecomen in der stadt van Uutrecht. Dair hi na ouder gewoenten mit groter solemniteiten geordineert ende gheset is te wesen die LII biscop van Uutrecht. Dese heer Sweer was heren Gherrits soen, den IX heer van Culenburch. Sijn moeder was heer Jans dochter die eerste van Egmont. Zijn broeders waren heer Hubrecht ende heer Jan, heren van Culenburch; heer Jan van Culenburghe, deken Sint Jans tUtrecht; joncheer Peter ende Gherrit van Culenburch besat ende berechte dat bisdom VII jaer. Mer hi en was mer X maenden gheweldich heer van den landen.

559 hebbennde AB.