Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van der electien heren Rodolfs van Diephout tot enen biscop van Uutrecht.
Dat XXIII capitel.

Als die exequien ende uutvaert des eerwaerdighen vaders, here Vrederixs van Blanckenhem, biscop van Uutrecht, waren ghedaen, ende mit groter eren volbrocht⁵⁵⁵, soe deden vele dyverse princen ende⁵⁵⁶ heren grote instancien ende vervolchginge om diverse personen, ende elck voer die sine te bidden ende te promoveren; want heer Diric van Moers, archibiscop van Coelen, badt voer jonckheer Roelof van Moers, sinen broeder; heer Jan van Heinsberch, biscop van Ludic, dede instancie voer heer Jan van Bueren, proest van Aken, des heren soen van Bueren; heer Otte, biscop van Munster, postuleerde voer joncheer Aelbrecht van der Hoey, sinen neve; hertoge Adolf van den Berge bat voer joncheer Gerrit van Cleve; ende hertoge Adolf van Cleve quam haestelicken selver in persoen, mit hem brengende heren Rodolf, des graven zoen van Dyephout, proest van Osenbrugge, ende canonic in den Dom te Coelen, om mitten anderen vasallen ende mannen der kerken van Uutrecht soude bidden voer den voerseyden here Rodolf. Ende doe elc sine bede hadde gedaen, so nam dye ecclesie haer beraet, ende die ecclesie, dat ridderscap ende dye hoeftsteden berieden hem elck bi hemselven om dat best te proeven ende te doen tot des Stichts behoef. Ende dair worden heimelike eerber personen uutgesent om na zijn gestant te vernemen in allen landen ende plaetsen, daer men wist dat hi meest vertiert ende meest regiment gehat hadde. Ende vernamen so van sijnre vromicheit ende wijsheit, als dat dat ridderscap van Overijsel ende VI, die Overijselse, steden, als Groeninghen, Campen, Swolle, Deventer, Hasselt ende Amersfoert mit die stat van Uutrecht ende die edelen des Stichts, als van Lichtenberch ende andere, overeen droegen, ende baden der

555 volbrockt AB.

556 inde AB.

[p. 267r]

ecclesie dat si kiesen wouden den joncheer Roelof van Diephout, want si genen beteren noch nutter en wisten tot des Gestichts behoef, nadat die landen gelegen waren. Ende den dach van der koer wert gheleyt, des daghes voer Sinte Martijns avont; ende dye vijf Godeshusen ginghen te capitel, ende gaven haer stemmen: enige koren joncheer Walraven van Moers; enige heer Sweer van Culenburch, den domproest; ende meer ander. Mer joncheer Roelof hadde verre dye meeste stemmen. Aldus had hi den koer voer allen. Ende men riep dair in den Dom, voert choer van docxael of, dat joncheer Roelof van Diephout gecoren was tot enen biscop van Uutrecht; ende hi was mitten hertoge van Cleve op die tijt in die stat. Ende hi wert gehaelt van den prelaten, geinstalleert ende in des biscops stoel geset, ende men sanck Te Deum laudamus. Ende men dede al dat men placht te doen, als daer een nijewen biscop gecoren is. Des anderen dages vergaderde dat capitel, ende daer worden geordineert notabele personen ende ambassiaten, geestelic ende waerlic, die haestelic gesonnen worden te Romen an den paeus, om hem te certificeren ende te kennen te geven die eendrachtelycke electie van haren nijewen biscop, dat hy wilde gewaerdigen dye te investieren ende confirmeren in sijn bisdom. Paeus Martijn die Vijfte heeft dese electie scarpeliken examineert ende ondertast, ende heeft bevonden dat si ghecoren hadden enen ongeleerden ende waerlyken man. Waerom dat hi de electie niet en woude admitteren noch toe laten, ende en woude hem niet confirmeren. Ende hi dede die ecclesie vermanen, dat si enen koren na den regulen ende settinge der Heiliger Scriften⁵⁵⁷ ende rechten, wiens leven ende wijsheit allen menschen mocht profijteren ende baten. Mer uut contumacien versmaden si des paeus vermaninge, ende en wouden anders ghenen kiesen dan dyen si postuleert ende ghecoren hadden. Dye ridderscap ende mannen der kercken van Uutrecht, ende oeck die Overijselse steden mit den Neder-Sticht, syende dat die paeus haer begeerte niet en woude toelaten, hebben si enen dachvaert geleyt, te houden in die stede van Deventer. Daer si allegader mitten hertoge van Cleve vergadert wesende, heimelicke secrete raeden ghehouden hebben, wat hem best in deser nootlicke sake goet dochte te doen ende te ghescien, tot des Stichts profijt ende oerbaer. Ende hebben nae langhe consultatien ende heimelicken raet onderling ghehouden eendrachtelicken met ghesamender hant een aliancie ende verbant myt malckanderen ghemaeckt, ende ghesworen, alsoe sy heren Roedolf niet hebben en mochten tot enen biscop, dat sy hem dan hebben ende houden wouden tot enen postulaet, voecht ende momber. Ende hebben hem terstont geset in allen possessien ende renten, steden ende sloten, ende gebrukenissen der kercken goeden. Ende doen dede hi slaen ende munten goude penningen, die men hiete postulaetsguldens.

557 scrrften AB.