Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe heer Floris van Alkemade, ridder van den Vriesen, geslegen worde, ende hoe si die Hollanders verdreven.
Dat XVIII capitel.

[p. 265r]

Nu willen wi weder keren op dye gesten ende feyten van wapenen die in den lande van Vrieslant sijn gevallen in desen tiden: als in den jare M IIII C ende XXI was een capetein in Oest-Vrieslant, gheheten Focke. Dese heeft vergadert een grote menichte van Vriesen, mitten welken hi crachtelicken belegen heeft die fautoers ende goede ghonners der Hollanderen binnen dat steetgen van Sloten. Hertoghe Jan van Beyeren verhorende den last ende benautheit sijnre vrienden, heeft hy doen vergaderen vele ontallike scepen, ende sende die over mit volc van wapenen om sine vrienden te ontsetten. Die Vriesen, siende die veelheit der scepen, meenden dat heel Hollant ende Zelant teghen hem gecomen hadde, hoewel datter nochtans boven thien man in elck scip niet en waren. Die cappetein Focke mit sijn Vriesen waren voir thoeft geslegen, en braken scielicken op van den belegge, ende liepen wech, elck sijns weghes. Ende aldus worden die Hollanders verlost ende ontset van den belegge. In datselve jaer was dair oec in Vrieslant een vroem Hollantse cappetein, geheten here Floris van Alkemade, ridder, ende lach op een sloetken gheheten Lemmer. Dese heer Floris worde jammerlic van binnen verraden ende van den Vriesen op dat sloetken doot geslegen. Ende de Vriesen jaechden alle die Hollanders wech die daer waren. Op dye selve tijt hadden sommige van den soudenijers hertoge Jans van Beieren een fortresse oft een bolwerc opgeslagen in een dorp gheheten Mackom in Oest-Vrieslant, ende beroefden dairuut die naeste geleghen dorpen tusschen Mackom ende die stede Wouderchom geleghen. Nu was dair een capitein gheten Zicko Zjaerda in dit dorp Mackom, ende hyltet mit desen Hollanders, dye opt bolwerc lagen, ende dede hen grote bijstant ende hulpe tegen die andere Vriesen. So geboerdet op eenre tijt dat hi om noetlike saken reisen moeste tot Groeningen; so was een cappitein geheten, tot Witmersen, int dorp, gheheten Tzaerd Acilame, ende was des anders wederpartie. Soe heeft dese Tzaerd uuten name⁵⁴⁹ van Zicke brieven gescreven ende mit desen Zickens zegel besegelt, die hi van enen ouden besegelden brieve hadde genomen, die hi by hem hadde. Ende sende desen brief tot Mackom, dair dye Hollamders, Zickens medegesellen, lagen, daer Zicke nyet of en wiste, inhoudende aldus

Mijn geminde vrienden! Ghi sult weten dat alle die Vriesen des lants van Oestergoe ende Westergoe teghen u comen gewapent, ende ic en weet niet hoe ghy u tegen hem luden sult mogen bescermen; want ten is in mijnre macht niet, u hulp oft bistant te doen. Daerom sijt sorchvoudich ende naerstich, hoe ghy best wech comen mocht. Als dye Hollanders desen brief sagen wel beseghelt, ende die gelesen hadden, waren si seer bevrucht, ende vreesden dat die Vriesen hem overvallen mochten. Ende namen bi nachte alle haer goet, ende drogen dat in haer scepen, ende staken dat vier in dat bolwerckt, ende verbranden dat mit dat dorp van Mackom, ende toghen weder in Hollant.

549 nane AB.