Hoe vrouwe Jacobe scheyde van hertoghe Jan van Brabant haren man.
Dat XVI capitel.
In ditselve jaer quam hertoghe Jan van Brabant ghevaren van Antwerpen in Zeelant tot Sinte Martijnsdijck, tot versoeke hertoghe Jans van Beyeren, ende vergaerden op tslot van heren Floris van Borselen, bi middele des heren vanGa naar voetnoot541 Assche; mer vrouwe Jacobe en wist hier niet of. Ende dair wesende, constituerde ende sette hertoge Jan van Brabant desen hertoghe Jan van Beyeren te wesen ruwaert der landen Hollant, Zeelant ende Vrieslant noch VII jaren lang. Voert gaf hy hem dye stede van Antwerpen mittet marckgraefscap van Herentaels. Hertoghe Jan van Brabant wederom tAntwerpen comende, dede hy versetten by rade heer Evert tSerclaes, hofmeester des voerseyden hertoechs, ende gaf oerlof alle dye vrouwen ende joncvrouwen van vrouwe Jacobe, ende versette haren staet alte samen. Ende hy dede weder by haer setten dye graefinne van Merre, die vrouwe van Wesemael, die vrouwe van Assche, met meer andere. Datwelcke vrouwe Jacobe sere mishagede. Ende claechde dat dye vrouwe van Beyeren, haren moeder. Die vrouwe Margriete, hertoechinne van Beyeren, dit horende, was seer ghestoert, ende reet van stonden an nae Brusel, ende ging soe verstoert op Couwenberch tot hertoghe Jan ende sinen rade, ende woude hemluden anders informeren om desen nijewen staet te breken ende te nijete te doen. Ende als si dat niet doen en mochte, sceyde si myt groten toorne van den raet, ende reet in haer herberge In den Spiegele, ende vrouwe Jacobe volchde haer na, al screyende, mit enen knecht langes die straten, tot haer moeders herberge, daer dye luden seer of verwonderden ende myt haer te lyden hadden. Des anderen dages reden die moeder ende die dochter tesamen in Henegouwen tot Kenout, ende daer bleven si.
Auteursrechtelijk beschermd