Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe die stede van Sinte Geertenberge verbrant worde.
Dat XV capitel.

Nu willen wi⁵³⁹ weder keren op die feyten ende gesten van oerlogen die in desen selven tijden ghescieden in Hollant, in denselven jaren van XX, als hertoge Jan van Beyeren die stede van Leyden an hem hadde gecregen. Soe lach heer Dirck van der Merwen, baelju van Zuyt-Hollant, als casteleyn opt huys van Sinte Geerten berge. Ende hi wist wel, dat die van Dordrecht seer naerstich waren om die stede onder haere subjectie ende heerscappie te hebben. Ende daerom had hy den poorteren van der stede te voren gheseyt: 'Tot wat tijden dat ghy die van Dordrecht in u stede laet comen, so segge ick u

539 willen r wi AB.

[p. 263v]

voerwaer, dat ick dat vier in u stede scieten sal.' Dese heer Dirck was een moedich strijtber man, ende was van als versien ten oerloghe dienende: van vitaelge, van wapenen, ende van als dat men op een huys behoeftich is, want hy hadde op tslot wel anderhalf hondert vrome knechten, mitten welken hy begeerde ende in meninge was dat slot mitter stede te defenderen, bescermen ende bewaren, tot behoef van vrouwe Jacobe. Die van Dordrecht senden uut haer soudenijers ende knechten tot Sinte Geertenberge, ende eyschten die stede op te doen, tot behoef hertoge Jans van Beyeren. Die poorters versmaden ende verachten die woerden van den castelein, ende lieten die knechten van Dordrecht binnencomen. dWelke siende de castelein, heer Dirc, stelde hem ter weer op tslot; ende als die knechten mit dye van Dordrecht binnen gecomen waren, beleyden si dat slot rontom seer sterckeliken, ende scoten sonder ophouden op tslot, ende deden menige assault ende spronckreyse, om dat slot te winnen. Heer Dirc, die casteleyn, die een cloec, vroem, wijs oerlechsman was, die was seer gestoert van desen inlaten der knechten, waerom dat hi overvloedeliken tot allen plecken ende steden dat vier in de stede scoot, also dat die gehele stede mit die kercke al tsamen verbrande op Sinte Lambrechts avont. Die stede dus jammerliken verbrant wesende, bleven nochtans dye knechten in die stede legghen, in den verbranden husen, mitten poorters, de seer desperaet waren. Ende belagen dat huys scarpelicker⁵⁴⁰ dan si te voren hadden gedaen. Die steden van Hollant dit vernemende, quamen binnen XIIII daghen daer mede leggen, om te wreken dat daer gesciet was van den brande; waerom dat si mit grote bossen cortouwen, slangen ende andere stucken mit allen seer op dat slot scoten, ende hadden meest alle die toirnen terneder geworpen mit die grote stenen die si scoten; mer heer Dirck, de castelein, mitten sinen, weerden hem vromeliken teghen die van buten wel XXVI weken lang. Ten lesten worde daer een tractaet van paise gemaect, als dat heer Dirck van der Merwen, die casteleyn, soude overgeven dat slot hertoge Jan van Beyeren, ende hi soude van den slote gaen mit sine gesellen, behouden haer lijf ende goet.

540 scapelicker AB.