Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den oerlogen tusschen dat Sticht ende Hollant.
Dat XII capitel.

Omtrent den einde des jaers van M IIII C XIX sijnder weder grote oerlogen opgestaen tusschen dat Sticht van Uutrecht ende tlant van Hollant. Hoewel de van Uutrecht ende Amersfoert vrede gemaect hadden mitten Hollanders, nochtans en mochten si niet veylich reysen doir Hollant mit haer goet ende comenscappe; want dye knechten des heren van Egmont, na den tractaet datter gemaect was, namen dye goeden uuten scepen, die uut Brabant ende Vlaenderen quamen omtrent Crimpen, dair die Lecke begint, ende dede die scepen sincken, ende namen die luden gevanghen. Die van Uutrecht senden briven an heer Jan, hertoge van Beyeren, binnen Dordrecht, begerende van deser gewelde justicie ende recht te gescien. Mer dair en quam⁵²⁹ niet of. Dyergelicken gesciede die van Amersfoert op die Zuerzee⁵³⁰, ende worden tot allen placken meer exactioneert ende bescattet dan men plach te doen. Dairenboven had hertoge Jan van Beyeren een aliancij ende verbant gemaect mit hertoge Reinout van Ghelre tegen dye van Uutrecht ende Amersfoert, op sulker condicien: waert sake, dat hy Amersfoert konde crigen, dat hy dat behouden souden onder sine subjectie ende dominacie; ende of geviel dat die burchgrave van Montfoirt die van Uutrecht defenderen ende bescermen wilde, ende dat men Montfoert becrachten mochte, so soude die stede bliven ende comen onder de dominacie hertoge Jans van Beyeren. Siende dan die van Uutrecht ende Amersfoert dat haer saken gheen expedicie noch voertganck en hadden, ende dat si gheen besceyt van hertoge Jan ghecrigen konden, reysden si tot hertoge Jan van Brabant ende vrouwe Jacobe, te kennen gevende die grote injurie ende ongelic dat hen gesciede; mer dye hertoge achtet luttel. Ende vrouwe Jacobe soude henluden gaerne geholpen hebben, mer si en hadde gheen macht. Wairom dat si weder thuyswert reisden, ende begeerden assistencie ende bistant van haren here biscop Frederic van Uutrecht, ende van den Overijselse steden. Ende als dese sagen ende vernamen dat die van Uutrecht ende Amersfoert alle daghe meer leets, injurie ende overlast worde gedaen van den Hollanders, hadden liever dairom een oerloge an te nemen, dan alsulken gewelt ende ongelijc te lyden. So hebben dan mit malkander gemaect een aliancie ende verbant, die biscop van Uutrecht mit sine stat ende andere steden zijns Stichts; heer Willem van Bredenroeden, Phillips, burchgrave van Leyden, mitter stede van Leyden; Jan, burchgrave van Montfoerde; Jan, heer van Haemsteden ende Benthusen, ende alle andere, die van den Cabbeljaus uut Hollant waren verdreven, tegen heer Jan van Egmont, heer Gerrit Boel van Heemskerc, hertoge Jans raden ende tegen alle haere fautoren ende adherenten, over⁵³¹ al Hollant. Ende tsjaers daeran ontseyde heer Vrederic van Blankenhem, biscop

529 qnam AB.

530 aldus A en B. Drukfout voor Zuderzee?

531 oner AB.

[p. 261v]

van Uutrecht mit zijn Sticht van Uutrecht den hertoge Jan van Beyeren, voecht van Hollant, mit allen sinen hulperen; ende van dien tijt voert was daer een groot oerloge in Hollant, durende omtrent twee jaer. Ende binnen dese tijt worden int lant van Woerden destrueert vele castelen, als Zulen, Honthorst ende Nesse. Ende op dese tijt togen eens die van Campen uut mit groter macht, ende quamen int eylant van Marcken, by Monickedam, ende verbranden dat dorp. Ende als die Hollanders mitten Waterlanders dat sagen, terstont quamen⁵³² si uut mit veel scepen ende scuten, mit gewapender hant, ende dwonghen die van Campen mitten Overijselsche weder te keren. Ende dair worter vele gevangen, geslegen ende overboert geworpen, die verdroncken. Dye van Uutrecht togen mede uut, ende verbranden die gerepareerde ende gemaecte husen van Yselstein, ende quamen oec op een tijt buten Aemstelredam, ende vingen vele poorters van der stede, die daer gingen wanderen, ende brochten se binnen Uutrecht.

532 u licht beschadigd in B.