Van den wrake dye over hertoge Jans doot worde gedaen.
Dat XI capitel.
Coninc Kaerl van Vrancrijc sende notabele ambassiaten an hertoge Phillips van Burgongen, hem excuserende van den dootslach zijns vaders, hertoge Jans, mit welke ontsculdinge hertoge Phillips wel tevreden was, ende hilt den coninc mitsdyen onsculdich; mer den dalphijn vervolchde hy tot allen plaetsen, ende dengenen die bi hem waren. Hi was out XXIIII jaer, doen sijn vader geslagen worde. Aldus verbant hi hem mit coninc Henric van Engelant, ende quamen mit groter macht voer Mellunen, ende wonnen dat; ende de heer van lIlle Adam had gecregen dye stede van Parijs, ende was daerin; ende dairna hadden si enen strijt tegen de van Armeniac, dair vele volcs verslegen wort; ende dair worde hertoge Phillips ridder geslogen. Dairna toghen si voer die stede van Monstreul die si wonnenGa naar voetnoot528; mer dat slot dat de here van Gijetri bewairde en wonnen si niet. Ende si eyscheden dat slot van den castelein; ende indien hi dat niet en dede, so wouden si alle de vrienden des dolphijns, die si in die stede gevangen hadden, an bomen hangen. Dit verhorende de castelein, gaf dat slot op in des conincs ende des hertogen handen; want hi ontsach henluden om den doetslach dier gesciet was an hertoge Jan. Doe nam hertoge Phillips sijns vaders lichaem, ende dede dat balsemen, ende liet dat brenghen buten Digioen, in Burgongen, in dat Cathuser cloester, ende wort aldaer begraven, nadat hi de graefscap van Vlaenderen ende zijn andere landen hadde gheregeert XV jaer.
Auteursrechtelijk beschermd