Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den pays dye daer ghemaect worde tusschen vrouwe Jacobe ende hertoghe Jan van Beyeren haren oem.
Dat IX capitel.

Also overmits desen groten oerloge vele castelen ende plaetzen verdestrueert, verbrant ende verwoest worde, ende de grote twist ende oerloge alle dage meerder ende groter worde in den landen van Hollant, so worde daer een dachvaert geordineert binnen die stede van Worichom, totten welcken als een princepael middeler hertoge Jan van Burgongen⁵²⁶ ghesonnen heeft sinen enige zone grave Phillips van Charlois, omtrent Sint Andries dach, mit heer Lodewijc van Lutsenburch, biscop van Terewaen, ende heer Peter van Lutsenburch, grave van Conversant, Brienne ende Adingen, sinen broeder.

526 Hurgongen AB.

[p. 260r]

Ende also daer een vast bestant gemaect was, soe quamen terselver dachvaert hertoghe Jan van Brabant mit vrouwe Jacobe sine huysvrouwe, ende vrouwe Margriete, haer moeder; ende hertoghe Jan van Beyeren sende daer sine commissarien ende ambassiaten, ende een groot baroen uut Beyeren, ende heer Gerrit Boel van Heemskerck, ridder, myt meer andere ridderen ende heren. Ende daer wort een tractaet van payse ghemaect in deser manieren: als dat hertoge Jan van Beyeren soude behouden dye stede van Dordrecht, mit alle sine rechten ende jurisdictien; die stede van Gorichom mitten lande ende heerlicheden van Arkel ende Lederdam ende Scoenrewoirt; die stede van den Briele mittet lant van Voern; die stede van Rotterdam; de heerlicheit van Woerden, ewich ende erflick durende; des soude hy alle dese landen ende steden te lene ontfangen ende houden van hertoghe Jan van Brabant ende sijnre vrouwen, die hertoechinne. Ende noch soude hi ontfangen binnen den terminen van twe jaren hondertdusent Enghelsche nobelen; ende hi soude wesen stedehouder van den lande van Hollant, Zeelant ende Vrieslant, III jaer lange; ende soude alle officien, prefecturen, baeljuscappen, scoutambochten ende scependommen der steden in den voerseyden landen ordineren ende setten dye een helfte uuten name van hem, ende dander helfte uuten name van sijnre nichten, na sine belieften ende goetduncken, dese III jaren lang, ende niet langer. Ende alle dese articulen worden bescreven ende besegelt ende mit ede gesworen te onderhouden opten XIX dach van Zelle, int jaer M IIII C ende XIX van allen den heren, die daer tegenwoerdich waren; ende hertoghe Jan van Beyeren was daer selver in persone mede gecomen. Dit gedaen wesende, namen die heren minnentlicken an malkanderen oerloef, ende elck toech thuyswert tsinen lande, ende worden hiermede verenicht ende versoent. Die van Uutrecht ende van Amersfoert worden doe mede versont, als dat men haer burgeren binnen die palen ende heerlicheden van Hollant ende Zeelant niet hinderlijc noch scadelijc wesen souden aen haer lijf noch in haer goeden. Mer hier en waren die here van Egmont noch sijn broeder heer Willem van IJselstein niet in geroert, die noch vianden bleven der stat van Uutrecht ende Amersfoert.