Hoe hertoge Jan van Beyeren die stede van Rotterdamme wan.
Dat VIII capitel.
Hertoge Jan van Beyeren, leggende binnen Dordrecht, was seer verblijt van der victorie die hi opten Brabanders ende Hollanders vercregen hadden; ende siende dat hem die fortune mede was, aviseerde seer scarpelicken hoe die stede van Rotterdamme mit cloecheit ende subtijlheitGa naar voetnoot525 soude mogen gecrigen, so heeft hi enighe gesonnen al heimeliken, wel gewapent, nae Rotterdamme. Ende mits hulpe van sommighe fautoers ende vrienden die si daerbinnen hadden, quamen si binnen de stede, ende worden die stede machtich op Sinte Victoers dach. Hertoge Jan, die nu seer gestijft ende gestarct was mit die stede van Rotterdamme, was seer verblijt, ende quam mit vele gewapents volcs binnen Rotterdamme, ende worde daer mede ghehult als een recht heer van den lande; ende hy bleef daer lange tijt leggen, tracterende mit sijne vrienden, dagelixs houdende secrete rade, hoe hy best soude mogen crigen die stede van Delft ende van der Goude. Dit vernemende vrouwe Jacobe, die hertoechinne, was seer ghestoert ende bedroeft, ende dede vergaderen vele soudenieren ende oerloechsknechten, ende leyde die in die steden van der Goude, Delft ende Scyedam, om die steden te bewaren. Dye hertoge en ruste niet, dach noch nacht, den Hollanders te benauwen ende bedwinghen, dat si ter Masen noch ter seewaert uut noch in en mochten.
Auteursrechtelijk beschermd