Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe hertoge Jan van Brabant troude vrouwe Jacobe, hertoechinne.
Dat VI capitel.

In den jare M CCCC ende XVII, als dat scisma ende twedracht in der Heyliger Kercken omtrent XL jaer hadde geduert, so is ten lesten doer Gods barmherticheit in der Heiliger Kerken eendrachticheit gecomen, ende dat concilie mit die gedeputeerde van den V natien van kerstenrijc mit die cardinalen coren tot een paeus van Romen Odo van der Colonnen, een edel Romein; ende dit was op Sinte Martijns avont in die winter. Waerom dat hij geheten worde Martinus, die V van dier namen; ende dit was noch int jaer van XVII. Ende opten XXII dach van no-

[p. 258v]

vembri daerna heeft dieselve paeus gedispenseert op dat huwelic van hertoge Jan ende vrouwe Jacobe, niettegenstaende die voerseide maechscap ende swagerscap. Ende die bulle wort heimeliken nedergesonnen van den ambassiatoren hertoge Jans. Datwelcke vernemende die vrienden van hertoge Jan van Beyeren, claechden dat die keiser, die des qualiken te vreden was, ende informeerden den paeus als dat vele scanden, partyscap ende oerloge overmits desen huwelicke comen souden mogen; sodat die paeus tot sijnder naerstiger instancie⁵²⁰ wederriep desen dispensacie, vanwelcke revocacie ende wederroepinge hertoge Jan van Beyeren copye gecregen heeft, die hi in enen besloten brieve hertoge Jan van Brabant gesonden heeft, om dat huwelic te beletten. Ende hertoge Jan van Brabant sant die bulle van der dispensacie bi grave Engbert van Nassouwen, here van der Lecke ende Breda, ende bi here Henric van Bergen an Zoem, an die hertoechinne, vrouwe Jacoba, doetertijt wesende in Hollant, in Den Hage. Ende dit was opten XXIII dach in januario, int jaer M CCCC ende XVIII. Ende opten VIII dach van maert daerna, quam hertoghe Jan met groter state van graven, baenroesen, ridderen ende edelen in Hollant, in des Graven Hage, bi vrouwe Jacobe; ende daer ghingen si te rade. Daer was die biscop van Doernick, mit andere ambassiatuers; hertoge Jans van Bourgongen, ende die raetsluden hertoge Jans van Brabant ende der hertoechinne vrouwe Jacobe, ende die gedeputeerde van den steden van Brabant, Henegouwen, Hollant ende Zelant. Ende dair visiteerden si die bulle van der dispensacie, ende oec die copie van der revocacie, daerof sy geen bulle, noch vidimus autentijc gesien en hadden. Ende alle ponten ende articulen overgeleit ende gewegen, wert dair gesloten dat men mitten huwelike voertvaren soude, na forme der Heiliger Kercken. Ende opten IIII dach van aprille, so troude die deken van der capellen in des Graven Hage hertoge Jan van Brabant, Lottringen ende Limburch ende vrouwe Jacobe, hertoechinne in Beyeren, graefinne van Henegouwen, van Hollant, Zelant ende Vrieslant, in presencie ende tegenwoerdichheit der ouder vrouwen van Beyeren, haer moeder; here Phillips, buchgrave van Leyden, here van Wassenaer; here Henric van der Lecke, ende oec vele edele vrouwen ende joncfrouwen, als die vrouwe van Sinte Martijnsdijck; die vrouwe van der Ameide; die vrouwe van Steenkercke. Ende hertoge Jan van Brabant, out wesende XVI jaren, besliep doe sinen bruyt, die hertoechinne, out wesende XVII jaren. Ende mit desen huwelicke waren die landen van Brabant ende Hollant seere gestijft, gestarct ende verblijt. Ende een lange wile hierna, so creech hertoge Jan brieven van den paeus Martijn voerseit, die hem ontboet mit notabele mannen, ende oec mit besloten brieven, hoe dat hi alleen uut vresen van den keiser die dispensacie wederroepen hadde, ende anders niet. Ende dat hertoge Jan ende vrouwe Jacobe sonder scrupel van consciencie tesamen bliven mochten in den huwelike bi hem gedaen. Datwelke oec tuychden ende certificeerden mit haren brieven die cardinael van Ostien ende die patriarch van Constantinopel. So is dan hertoge Jan van Brabant, als wettich man ende momber van sijnre vrouwen ontfangen geweest in die stede van Henegouwen, van Hollant, van Zeelant ende van Vrieslant, mit groter solemniteiten, uutgeseit tot Dordrecht ende in Den Briele. Desgelijcs wert daerna sijn vrouwe als hertoechinne van Brabant ontfangen mit processien ende groter eren in den lande van Brabant.

520 instacie AB.