Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den strijt dye binnen Gorichom was.
Dat V capitel.

Hertoghe Jan van Beyeren binnen Dordrecht wesende, screef brieven an den steden van Hollant, dat si hem voer een voecht ende momber ontfanghen wilden, want sijn nichte, vrouwe Jacobe, een wedue was; ende omdat dat concilie nyet dispenseren noch toelaten en wilde dat huwelick voerseyt. Ende des en woude hi sijnre nichten, vrouwe Jacobe, niet hinderen mer vorderen in al dat hi vermochte, als hi seyde; mer contrarie was waer. Ende daer werdt een dachvaert ghehouden tot Schoenhoven, daer dit opgedaen wordt; mer het worde hem gheweygert van sine nichte by rade haerre drye landen, ende si presenteerde haren oem alle datghene dat in den tractaect van den huwelijcke hem toegheseyt was. Waeromme dat hertoghe Jan toernich worde, ende reysde wederom tot Dordrecht, omtrent Sinte Victoors dach, ende maecte vrientschap met sommighe heeren, ende hildt aldaer eenen heymelijcken raet metten gheenen dye van

[p. 257v]

der Cabbeljauscher partien waren; ende dese dachvaert geeynt wesende, worde hij van die van Dordrecht gehult ende ontfangen voer enen rechten voecht ende momber des lants van Hollant; ende dede terstont ontsegghen vrouwe Jacobe, sijnre nichte, ten waer dat si haer stelde onder die voechdie van hem. Doen maecten aliancie ende verbonden mit hem joncheer⁵¹⁹ Willem van Arkel, here Jan van Egmont, ende here Willem sijn broeder, ende si beloefden hem te doen assistencie, hulp ende bistant mit allen haren fautoers ende adherenten, mit lijf ende goet, daer si konden ende mochten. Ende hi beloefde hemluden weder te setten ende te doen hebben alle haer heerlicheden, goeden ende erven, daer si uut verdreven waren. Dairna, omtrent Sinte Lijsbetten, is here Jan van Egmont ghecomen mit een deel soudenyers bi hulpe enige poorteren, ende quam heimelic binnen die stede van Gorichom; ende creech die in tot behoef joncheer Willems van Arkel, sinen neve. Dat siende alle dye fautoers ende goedegonners ende vrienden van vrouwe Jacob, ende dat si hem niet wederstaen en mochten, vloden snelliken op dat slot dat hertoge Willem, vrou Jacobs vader, dair hadde doen maken; ende corts dairna quam joncheer Willem mit veel baroenen, heren, ridderen ende knechten, mit veel gewapents volcs, ende worde wedergeset in sine heerlicheit des lants van Arkel. Mer dat casteel bleef onder die subjectie der hertoechinne, want die borchsaten dat vromelicken hilden tegen die van binnen. Dit verhorende hertoge Jan van Beyeren quam corts dairna tot Gorichom, ende een luttel tijts dair geweest hebbende, in heymeliken rade, quam hi weder tot Dordrecht. Die doerluchtige hertoechinne, vrouwe Jacobe, dese quade nyemaren vernemende, dede vergaderen van stonden an vele vrome wapentuers. Ende quam sere gestoert wesende in Hollant; ende vergaderde alle haer vrienden, mit dye van Uutrecht ende Amersfoert, ende maecte haer starck om te wreken dat haer misdaen ware. Ende is gecomen mit haer moeder, mit vele scepen, groot ende cleyn, die Merwen opvarende mit ontwonden bannieren voir Gorichom. Ende dye cappeteyn ende hoeftman van desen here was joncheer Walraven van Bredenroeden, ende die doetertijt geordineert was van vrouwe Jacobe te wesen stedehouder der landen van Hollant, Zeelant ende Vrieslant. Ende als si daer gecomen waren, worde vrouwe Margriet mit haer dochter, vrouwe Jacobe, op dat slot gelaten; ende dat ander heer braken een ghat in der mueren bi dat slot, daer si alle doerghinghen om dye stede te vercrighen. Dit siende joncheer Willem, stelde hem in ordinancie, om enen strijt met hem te vechten; want hij hadde wel vierduysent vrome vechtende mannen. Daertegen stelden hem dat heer des hertoechinnen in ordinancie, om in dye stede te gaen, ende

519 joucheer AB.

[p. 258r]

den joncheer van Arckel te bevechten. Ende hierenbinnen, so worde joncheer Walraven van Bredenroeden, ridder, geordineert, ende joncheer Willem van Arkel worde oec an dander side ridder ghemaect. Ende die joncheer van Arkel hadde enen diepen graft laten graven tusschen hem ende dat slot, dat men niet lichtelic bi hem comen mochte. Mer der hertoechinne volc quamen van dat slot mit ontwonden bannieren, mit groten gecry, ende ghingen stoutelicken mit die van Uutrecht ende van Amersfoert over dye graft, ter stedewert in. Die joncheer van Arkel stont mit sinen hoep teghens dat huys in een strate, mit ontwonden bannieren, ende sagen dat heer over die graven comen. Ende der hertoechinnen volc trat stouteliken an tot an den luyden. Als die joncheer van Arckel dat sach, trat hij oec vromelic hem tegen; ende daer quamt tot enen groten stride: daer wort uutermaten sere gevochten ende sere gedrongen, ten lesten dat sommige van des joncheren volc die after waren, begonnen te wiken; ende veel lieper wech, ende der vorstinnen vrienden wonnen den strijt. Ende bleef an die Arkelse side dootgeslagen joncheer Willem van Arkel, die daer te voren ridder geslagen was, ende sine heerlicheden die quamen op des heren kinderen van Egmont; want die vrouwe van Egmont was een enige suster van joncheer Willem, ende hertoge Reinout van Gelre was haere beyder oem, die oec sonder kinder starf. Behalven joncheer Willem bleven daer noch geslagen die joncheer van Petersom; Henric die bastert van Arkel; die graef van Opburgen; joncheer Allert van Bueren; Splinter, die bastert van Nyenroede; Otte van Gelcom; Otte van Ghemen; Willem van Appeldoern, mit noch wel M man, edel ende onedel. Ende daer worden gevangen die grave van Vernenburch, die grave van Hulburgen; here Henric van Hoemoet; die here van Milendonck; dye here van Proyen; die voecht van Waldorp; die joncheer van Batenburch; here Dirc van Lienden; here Willem van Ysendoern; here Aernt van Ordingen; here Raes sijn broeder; here Dirc van Hemmen; die joncheer van Oerslot; Aernt van Egmont; Otte van Vueren, ridder; Jan van Heteren; Jan van Oyen; Aernt van Craenhem; here Aernt van Harlaer, ridder. Die van Uutrecht hadden gevangen here Jan van Egmont, mit meer andere edele ende onedele, tot M toe. Ende in desen stride bleef mede verslagen van der vorstinnen side joncheer Walraven van Bredenroeden, doer versumenisse sijns selfs dienres; mit weinich andere, daer si vele an verloes, ende sere rouwich om was. Dese bloedige strijt gesciede opten eersten dach van december. Desen strijt gedaen wesende, worde joncheer Walraven mit groter droefheit gebrocht tot Vianen, ende leyt dair begraven in de parochikerke in dat choer, voer dat Hoge Outaer, afterlatende II sonen, als Reinout, here van Bredenroeden, van Vianen ende Ameyde, ende Ghijsbrecht, domdeken der kercken van Uutrecht, ende na elect der voerscreven kercken; ende vrouwe Johanne, haer beyder moeder, here Henrics dochter van Vianen ende Ameide, starf des jaers dairan. Ende want haer sonen noch jonge kinderen waren, so nam se onder sine voechdie joncheer Willem van Bredenroeden, haer oem. Ende joncheer Willem, de dair jammerliken verslagen ende versmoirt lach in sijn eygen bloet, worde mit groter droefheit begraven tot Gorichom in der kercken, onder enen costeliken tombe. Dit gedaen sijnde, besette die vorstinne dye stede mit haer volc van wapenen, tot bewaernissen van der stede ende dat slot; ende danckende die van Uutrecht ende van Amersfoert, toech si mit haren gevangen in des Graven Hage.