Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat vrouwe Jacob versekert wort tot eenen man hertoghe Jan van Brabant.
Dat IIII capitel.

In ditselve jaer van XVII worde vrouwe Jacoba in allen steden van Hollant, Zeelant ende Vrieslant gehult ende ontfangen mit groter triumphen ende eren voir enen rechten ende erfvrouwe der landen voerseyt, ghelijck si in Henegouwen ontfangen was. Ende om te aftervolgen die begeerte wilen hertoge Willems van Beyeren, als dat men sijn dochter hijlicken ende bestaden soude an hertoge Jan van Brabant, niettegenstaende dat si malkanderen ten tweden grade bestonden, want si beide broeder ende suster kinder waren; want hertoge Willem hadde te wive vrou Margriete, hertoge Anthonis van Brabant suster, dese hertoghe Jans vader. Ende als hertoge Jan van Brabant vernomen hadde dat hertoge Willem oflivich gheworden was, toech hi mit schonen staet te Ghent, bi hertoge Jan van Bourgongen, sinen oem, ende sprac daer van den huwelijcke tusschen

[p. 257r]

hem ende vrouwe Jacoba, sijnre nichten; so wert dair een dachvaert gheordineert te wesen tot Biervliet, daer hertoge Jan van Brabant quam mit grave Phillips van Charloys, sinen neve, hertoge Jans soen van Bourgongen, mit vele andere baenroetsen ende edelen. Op dander syde was dair vrouwe Jacoba van Beyeren, wedue des dolphijns van Toreinen, graefinne van Henegouwen, Hollant, Zeelant ende Vrieslant, mit vrouwe Margriet, haer moeder, hertoge Jans suster van Bourgongen ende moye van hertoge Jan van Brabant; ende here Jan van Beyeren, elect van Ludick, vrouwe Jacobs oem, mit meer ander baenreheren, ridderen ende edelen van den landen. Ende dair wort gheconcludeert ende gesloten dat men soude volbrengen dien uutersten wille hertoge Willems van Beyeren, ende dat tractaet van den huwelike wort daer gemaect tusschen hertoge Janne ende vrou Jacobe; ende si versekerden malcanderen voert te varen also verde die Heilige Kercke dat admitteren ende toelaten wilde, bi dispensacie ende oerlove dat vercrighen mochten. Ende des anderen dages op enen sonnendach, als opten ersten dach van Oestmaent, soe swoeren si beyde mitten huwelike voert te varen op condicien voerseyt; ende daer worden brieven of gemaect mit grote peinen. Ende onder andere ponten ende articulen wort daer gesloten ende geseyt, dat here Jan van Beyeren, die elect, behouden soude alle datghene dat wilen eer hertoge Aelbrecht sijn vader ende hertoge Willem sijn broeder gegeven hadden, ende datgene dat hem van vrou Jacobe sine nichte hem toegeseyt was; ende midtsdien gaf die elect sijn consent in dit huwelic. Ende hiermede sceide die dachvaert minnentlic. Ende daer worden notabele ambassiaten ende oratoers uutgesonnen int Concilie van Constans, om te vercrigen dispensacie van den huwelike; want hertoghe Jan ende vrouwe Jacobe waren suster ende broeder kinder, ende oec die dolphijn, haer eerste man, ende hertoghe Jan van Brabant bestonden malcanderen in den derden graet; mer si en konden gheen dispensacie crighen van den concilie . Want keyser Seghemont van Romen ende hertoghe Jan van Beyeren beletten dat mit alre macht, daer si konden. Ende here Jan van Beyeren werdt alsoe ghesint, dat hi int voerseyde jaer van XVII, in die maent van september, uut die stat van Ludic toech, ende en quam daerna nye weder daerin; ende quam in Hollant tot Dordrecht. Ende hi sant notabele ambassiaten in den Concilie van Constans, ende resigneerde aldaer by sinen procuratuer dat bisdom van Ludick, dat hij XXVII jaer lang hadde berecht, ende sette dat in handen van den paeus van Romen. Ende hij dede aldaer groote instancie ende arbeyt om te beletten die dispensacie van hertoge Janne ende sijnre nichten; ende dit worde hertoge Jan van Brabant heymelijcken te weten ghedaen van eenighe vrienden dye hij hadde.