Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den beghinsel des heerlicheits van Purmereynde.
Dat XXV capitel.

Bi desen hertoge Willems tiden was een vermaert man uut Waterlant geboren, geheten Willem Egghert. Dese Willem Eggert was een rijc man van gelde ende goede, ende hadde den tijt dat hertoge Willem vluchtich was, voer sinen vader vele gelts ende scats gedaen, waeromme hi namaels altijt groot was, ende wel ghesien bi hertoge Willem. Want hertoge Willem hadde hem gemaect overste tresorier van den lande van Hollant. Dese Willem Eggert was alleen een sciltboertich man, ende gheen ridder. Opdat hi hier namaels in der luyden memorie ende gehoechnissen wesen soude dede hi in een vergaderen alle die lantluden die wijt ende verde saten int lant van Purmerlant, bi twater gheheten die weer, ende dede daer timmeren een starc casteel ende een clein stedeken, dat welke hi dede hieten Purmereynde; welke stede ende slot mittet lant van Purmurlant mitten dorpen Neck ende Hilpedam hi namaels vercreech van hertoge Willem van Beyeren. Ende aldus was dese Willem Egghert deerste fondatoer ende stichter ende here van Purmureynde, sonder ridders name. Ende als hi verhoerde den doot sijns liefs heren des hertogen van Beyeren, was hi uutermaten sere bedroeft, ende en leefde mer II dagen daerna, ende starf op sijn casteel, dat hi getimmert hadde. Hi liet enen soen after, geheten Jan Eggert; Alijt, heren Gherrits wijf van Zijl; Janne Reinouts wijf van Brakel. Dese Jan Eggert, overmerckende dat herenhulde ende pays gheen erve en is, heeft hij na den doot sijns vaders sijn patrimonium ende vaderlic erf vercoft vele ende diverse personen, mer die heerlicheit van Purmureynde mitten dorpen Neck ende Hilpedam met Purmurlant vercoft hi here Gerrit van Zijl, ridder, sinen swager. Ende is mit desen ghelde ende goeden getogen in Vlaenderen in die stat van Ghent, ende bleef daer wonen mit alle sine nacomelingen. Hi fondeerde tot Oudenaerden een cloester van der Reguliers Oerde, ende noch een cloester binnen Ghent, van joncfrouwen ende nonnen, gheheten Bethleem, van derselver Oerden. Ende als here Gerrit van Zijl dese heerlicheit van Purmureinde een wijl tijts hadde beseten, vercoft hi die weder here Jan, burchgrave van Montfoerde, ende nu ter tijt besitter of is dye grave Jan van Egmondt.