Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Dat XXIIII capitel.
Van hertoge Willems bastaert sonen, ende van die heerlicheyt van Hoechtwoude.

Dese hertoge Willem van Beyeren liet mede after bastertkinderen, als Lodewijc, Evert, deerste here van Hoechtwoude, ridderen, ende vrouwe Beatris van Vliet. Dese heere Evert was die eerste here van Hoechtwoude in West-Vrieslant. Hi dede maken een schoen huys, gelijc een casteel, binnen sine heerlicheit van Hoechtwoude, ende hi hadde te wive Floris dochter van Kijfhoec, dair hi bi wan Anthonis van Hoechtwoude. Dit dorp plach te hieten Houtwoude. Dese Anthonis van Hoechtwoude hadde te wive Zophie Jans dochter van Poelgeest, daer hi bi wan V sonen ende een dochter, als here Bouwen van Hoechtwoude, ridder; Willem; Gerrit; Cornelis ende Evert, die een monick tot Egmondt was; ende die dochter geheten Jutte was een nonne te Poel buten Leyden. Dese here

[p. 254v]

Bouwen vercoft die heerlicheit bi sinen levende live here Jan, grave van Egmont, also hi gheen kinder en hadde. Die bastaertdochter van hertoghe Willem hadde eerst te man here Phillips van Dorp, ridder; daer en had si gheen kinder bi. Dairna nam si te man Jan van Woerden, here van Vliet, ridder, daer si bi wan Gherrit van den Vliet, schiltknape.