Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van hertoghe Willems basterts broeders, ende van den eersten here van Scagen.
Dat XXIII capitel.

Dese edele hertoge Willem hadde vele bastaerts broeders, van hertoge Aelbrecht, sinen vader, gecomen wesende, als joncheer Adriaen, ende Willem, deerste here van Scagen. Dese here Willem was eens geweest tot Sinte Catrinen in Alexandrien, ende II mael ten Heiligen Lande, tot Jherusalem⁵¹⁴, daer hi ridder geslagen worde. Ende was geordineert ende geset te wesen castelein opten huse van Medenblic. Daerna, als hertoge Phillips van Bourgongen geworden was grave van Hollant, heeft hi desen here Willem om sijnre doechden ende eren willen gegont ende gegeven een heerlicheit in West-Vrieslant, mit III dorpen, als Scagen, Berninghorn ende Haringhusen. Ende comende in zijn heerlicheit van Scagen dede hi daer maken een scoen huys, dair hi mit sijn huysvrouwe wonende bleef. Ende aldus was dese here Willem die eerste here van Scagen. Hi dede oec bedyken bi dye Zype bi Sinte Martijns dorp een groot stucke lants, dat hi dede hieten dat Nyelant. Hi hadde te wive⁵¹⁵ Alijt, here Jans dochter van Hodenpijl, ridder, daer hi bi creech, behalven die dochteren, III sonen, als here Aelbrecht van Scagen, ridder; Jan van Scagen, scout van Haerlem, ende Willem van Scagen. Hi was alle sine dagen een goet vroem ridder, ende hi dede vele loeflicke wercken. Hij starf int jaer Ons Heren M CCCC ende LXXIII, ende die heerlicheit quam op here Aelbrecht van Scagen, sinen outsten sone, die te wive hadde Adriaen Ghijsbrechts dochter van Nyenroen ende van Velsen, daer hi bi wan een enige dochter, geheten Joest; die eerst te man hadde Wouter van Egmont, here van Suetermeer; ende na nam si heer Joest van Borselen.

514 Jherusatem AB.

515 aldus B; wine A.