Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe hertoge Willem van Beyeren oflivich worde.
Dat XXI capitel.

Op dese selve tijt lach hertoghe Willem van Beyeren noch in Henegouwen. Ende sijn been, dat bestont alle dage quader ende argher te worden, ende wert swellende; ende dat bysonder op die plaetse daer hem wijlen eer een hondt hadde ghebeten.

[p. 253r]

Ende als hi gevoelde dat hi vast alle dage crancker worde, dede hi bi hem comen enen cyrurgijn ende meester, daer hi groote betrouwen op hadde. Ende hi liet dat been sniden, den meester seggende ende hopende dat te doen sonder enige perikel des lichaems. Ende van dien dage voirt worde die hertoge van dage te daghe alle tijt crancker, dat hi bevoelde dat hi soude moeten sterven; waeromme dat hi sine biechte dede, ende ontfinc die Sacramenten⁵⁰⁷ der Heiliger Kercken. Ende opten lesten dach van mey, int jaer XIIII C⁵⁰⁸ ende XVII, gaf hi God den Here sine siele op, nadat hij die graefscappen van Henegouwen, Hollant, Zeelant ende Vrieslant¹⁰⁹ XIII jaren lang met groter eren ende ontsich hadde geregeert, afterlatende een enige dochter, vrouwe Jacoba, wedue des hertogen van Tours, diewelke hertoge Willem begeerde dat men se tot enen man geven soude hertoge Jan van Brabant. Ende sijn lichaem worde mit groter triumphen ende feeste, mit wenender uutvaert begraven tot Valenchijn in Henegouwen. Dese hertoge Willem was alle sijn dagen een straf man tegen sine vianden, ende tegen sine vrienden een uutnemende goedertieren prins ende heere. Ende sijn huysvrouwe Margriet, hertoge Phillips Lehardijs dochter, leefde menich jaer daernae, ende worde te Kenout begraven in Henegouwen totten Jacoppinen.

507 saeramenten AB.

508 aldus C; ontbreekt AB.

109 Vrieslanet AB.