Hoe die Dolphijn van Vrancrijc, vrouwe Jacobs man, starf.
Dat XX capitel.
In ditselve jaer quam in Hollant bi hertoge Willem van Beyeren, Johan, hertoge van Tours, des conincx Kaerls soen van Vrancrijc, die VI, vrouwe Jacobs man. Dese hadde enen broeder, geheten Kaerl, ende was dolphijn, ende was cortelinge gestorven; daerna worde dolphijn die grave Kaerl van Poytiers; ende dese en leefde oec niet lange. Waeromme dat dese hertoge Jan van Tours, des conincs III soen, geworden is dolphijn van Vrancrijc. Ende hertoge Willem dede vergaderen enen sconen staet van sine ridderen ende heren, ende is mit sinen swager den dolphijn gereden in Henegouwen, also hi van den coninc sinen vader ontboden was te comen, opdat hi vandaen soude riden na Parijs, ende aldaer verwachten dengenen die van den coninc ende der coninghinnen geordineert waren om hem te ontfangen. Hierenbinnen is by hem gecomen een van sine secrete vrienden, die hi wel betroude, ende heeft hem gepresenteert een scoen blinckende ende suverlic pansyser, dat seer starckelic was introikeert ende gevenijnt. Dye dolphijn dit pansyser siende, behaechdet hem uutermaten wel, ende sonder enich afterdencken toech hi dat an; ende terstont worde hi van tvenijnt crachteliken doersteken, ende dat pansyser weder uut doende worde hi mit eenre groter siecten bevaen. Dair worden vele meesters ende doctoren geroepen, mer weinich baet ende profijt deden si; want dat venijn so uutermaten starc was, dat sijt niet verdriven en mochten. Waeromme dat hi hem dede berechten mitten Sacramenten der Heiliger Kercken, ende starf in Compingen, den IIII dach in aprille, als hi vrouwe Jacob II jaren te wive hadde gehat, out wesende XX jaer, ende vrouwe Jacoba XVI jaer. Ende si en lieten geen kinder after. Ende sijn lichaem worde gebrocht tot Parijs, ende dair begraven. Ende doe worde dolphijn sijn broeder, hertoge Lodewijc van Aquitanien, die oec corts starf; ende na hem worde doen dolphijn die V soen, geheten Kaerl, ende dese worde na sinen vader coninc van Vrancrijc.
Auteursrechtelijk beschermd