Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van een compromis ende beloftenis die hertoge Willem nam van alle sine edelen ende steden van Henegouwen, Hollant, Zeelant.

Hertoghe Willem anmerckende dat hi over die LII jaren out was, ende dat hi geen kinderen meer en hadde dan een enige dochter geheten Jacoba, die alsdoe getrout hadde den III sone van coninc Kaerle de VI van Vrancrijc, ende doe ter tijt die outste sone, ende was dolphijn van Vrancrijc, aldus so dede hertoge Willem een dachvaert beroepen van allen heren, baroenen, ridderen ende edelen der steden, groot ende clein, mitten baeljuwen ende officieren der landen van Henegouwen, Hollant, Zelant ende Oest-Vrieslant. Ende als si allegader waren vergadert, heeft hi begeert van henluden te hebben een loftenisse, dat waert sake dattet geboerde dat hi oflivich worde sonder manlicke persoen van enen soen after te laten, dat si alsdan genen anderen here annemen of kennen en wilden voer haren here, dan sijn enighe dochter vrouwe Jacoba, ende dat si dye hulden ende ontfangen wouden voer haren eygen ende warachtigen vrouwe ende graefinne der landen voerseit, ende dat si haer wilden stiven, starcken ende assistencie doen tegen alle diegeen die haer daerin souden mogen letten of wederstaen. Datwelcke alle die edelen, ridderen ende knechten, ende alle de gemene steden gaerne ende goetwillichliken overgaven. Ende hiervan worden gemaect goede, besegelde brieven, besegelt mitten edelen ende stede segelen der landen voerseit, anno XIIII C ende XVII.