Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat bestant tusschen hertoge Willem ende hertoge Reinout uutghinck.
Dat XI capitel.

Omtrent dese tijt, int selve jaer, is dat bestant uutgegaen tusschen hertoge Willem van Beyeren ende hertoge Reinout van Gelre,

[p. 249r]

waeromme dat hertoge Willem gheordineert heeft enige scepen van oerloge op die Zuderzee tegen die Gelressen, opdat si van Harderwijc ende van der Elburch in die zee niet comen en souden. Ende noch hadde hertoge Willem tot sijnre vrientscappen getogen die stede van Amersfoert, dye mit vele scone privilegien begavende, uut welke stede hi dicwils reet mit gewapender hant in dye Velue, rovende ende verbrandende vele dorpen ende huysen, ende mit hem nemende een groten roef ende vele gevangen, ende quam mit eren weder in die stede. Daertegen is weder ghecomen joncheer van Arkel, ridtmeester, gheordineert over die landen van Gulic ende Gelre, mit vele gewapents volcs, doer beveel des hertoghen van Ghelre, ende begreep dat casteel tot Hoeflaken; ende die Ghelresse hadden daer doen opslaen een groot starck bolwerck tegen den oploep van die van Amersfoert, ende besetten dat mit vrome, cloecke wapentuers, om die bescermenisse des slots van Hoeflaken. So ist gebuert, op eenre tijt, dat here Hubrecht van Culenburch, here Jan van Vianen ende here Aernt van Leyenburch, ridderen ende cappeteinen des Hollantschen heers, leggende binnen Amersfoert, vergadert hebben enen sconen hoep volcs van wapenen, ende sijn getogen uut Amersfoert, omme te versoeken haer vianden van Hoeflaken, om die te slaen ende te verdriven. Datwelke vernemende die opten huyse ende in den bolwercke waren, sijn terstont vandaen geruymt ende wechghelopen. Die Hollanders ancomende, vindende dat huys ende dat bolwerck ledich, verwoesten si dat, ende brakent of. Dat gedaen sijnde, togen si na Nyekerck, daer si dat vier instaken, ende verbranden vele husen, ende namen enen groten roef, ende quamen weder ongescent binnen Amersfoert.