Hoe hertoge Reinout van Ghelre overgaf hertoge Willem van Beyeren die stede van Gorichom ende die heerlicheit van Arkel.
Dat XII capitel.
Int jaer Ons Heren M CCCC XII worde een pays ende vrede ghemaect tusschen dese II machtige princen in deser formen ende manieren: als dat hertoge Reinout van Ghelre soude resigneren ende overgeven hertogeGa naar voetnoot498 Willem van Beyeren die stede van Gorichom mit allen sinen toebehoren, ende hertoge Reinout soude joncheer Willem van Arkel, sinen neve, induceren ende daertoe brengen om te resigneren ende over te geven hertoge Willem dieselve stede mitter heerlicheit van Arkel; ende noch worde daer gedetermineert ende uutgesproken, dat hertoge Reinout ontfangen soude van hertoge Willem voer die scaden ende kosten die hi in die stede van Gorichom hadde gedaen, die somme van C M Vrancrijcse cronen. Ende hertoge Reinout die gaf joncheer Willem, sinen neve, weder die heerlicheit van Born, ende tslot te Oyen, mit VII dorpen dairom leggende, ende noch V M Rijnsche gulden jaerlicxs uut die tollen van Lobick. Dit aldus gesloten wesende binnen Wijck te Duersteden, so resigneerde ende overgaf joncheer Willem van Arkel voer hem ende sine nacomelingen, hertoge Willem voerscreven dye stede van Gorichom mitter heerlicheit ende lande van Arkel. Ende mit deser uutsprake souden die II mogende princen versoent ende verenicht wesen, ende buyten deser soenen bleef die here van Arkel, die daer niet in begrepen en was. Ende van dier tijt worde die stede van Gorichom mittet lant van Arkel incorporeert ende een lit der graeflicheit van Hollant; ende dit geschiede omtrent Sint Jacobsdach. Omtrent dese tijt worde oflivich vrouwe Margriet van Cleve, hertoge Aelbrechts anderde wijf, ende leit begraven in Den Hage totten Jacoppinnen int cloester dat si selver hadde ghesticht.
Auteursrechtelijk beschermd